big007 發表於 20-8-24 07:52
我估係因為我成日諗住返香港
所以冇心機做呢邊嘅事, 例如識朋友, 投入生活等等......
呢度啲人只係hi and b ...
既然而家進退都難,不過試下由今日開始開放一下,我唔係好清楚TX果邊,但加州呢邊嘅人係普遍幾友善隨和,上巴士坐隔離都可以傾兩句,以前我都唔習慣,無拿拿有人同我講個袋好靚,又試過我睇緊本書,對面位果個乘客話佢都睇過果本書(講絲帶編織/繡花),跟住佢喺個袋拎咗佢整緊果個絲帶繡花出嚟俾我睇,喺街跌倒兩次都有好多好心人喺扶我問我有冇事,駛唔駛去醫院。。。可能我比較寬心,呢D經驗我可以開心好耐。
我細個好怕羞,但偏偏成日俾老師選出嚟參加比賽,朗誦、講故事、唱歌、跳舞、作文。。。某程度上我要克服心理障礙,雖然每次我塊面都紅晒,但都頂硬上。出嚟做嘢我揀可以喺後面唔需要見客果種,但久而久之,職位升得高咗,加上行業慢慢轉型,我已經唔可以喺幕後,見客見vendors/sales rep變成每日例行工事,慢慢叫做習慣咗。
嚟到美國,最初唔慣,D人介紹自己時,好多吹到上天,但後來發覺其實都係一種溝通方法,當然我唔鍾意吹噓,但適當去幫自己定位係必須嘅,而且有時話題就係咁打開。你鍾意講嘢,有冇去做吓義工?我契媽契爺同契哥一定住TX,契媽契爺以前日日去老人中心,而家疫情冇得去,佢地話老人中心有嘢食有活動,有時有人去表演,好好玩,好過喺屋企悶。
仔女小學時,我有成日去學校做義工,之後專幫學校做中文翻譯,將英文通告譯做中文,學校有會議時,如果冇校區翻譯員到場,我做即時傳譯,慢慢有好多家長搵我問嘢,去到仔女中學,我有加入仔女家長開嘅WeChat groups,將學校資訊分享俾其他家長,到今年仔上高中,好幾個家長加我微信,想我幫手問嘢,我又冇咩所謂,都係問一句。其實因為幫手做翻譯,我同老師校長PTA比較熟悉,同其他家長又有話題,唔一定話可以成為朋友,但叫識下人,同時又學到好多嘢。
你有冇咩興趣?試下搵下興趣班,或者多D上嚟傾下計,有時自己鑽牛角尖係睇唔到另外嘅出路,就算果D並非100%如你所願,可能亦唔太差呢。
花旗太太生活在花旗國,留意時差,你問我未必即時答到。