樓主所講個 d 公務員樓，係60-90年代前殖民地政府批地俾公務員合作社所建成嘅樓。地點有好多都好正：例如跑馬地藍塘道、薄扶林沙宣道 (舊羅富國對面)、九龍塘訊號山、九龍城喇沙附近等，次一 d 嘅地區有土瓜灣美善同道、漆咸道、馬頭圍道、何文田、北角七姊妹道、天后廟道、西環士美菲路等多不勝數，包括以前寶翠園都係。
呢 d 公務員合作社嘅公務員樓冇地價，而且只係得一個大契。所以以前公務員買呢 d 公務員樓必須無双重房屋福利，亦都要其他業主開會批準先至可以成交，成交時仲要另外俾個枱底價舊業主。但因為冇契，所以冇銀行肯受按。後來有部份公務員合作社嘅公務員樓經全體業主通過拆契，所以有部份嘅公務員樓可以分契並且自由買賣而無須其他業主開會批準，只要補地價後亦可賣俾非公務員。(以前都試過有 d 買賣全體業主唔批，係因為新業主職位太低！)
呢 d 公務員合作社嘅公務員樓大多數都係 4-5 層高要行樓梯，但亦都有 d 有電梯嘅大厦，例如西環士美菲路蒲苑、北角英皇道寶石樓等。
而屯門至樂花園同粉嶺海聯等都只係政府產業處買比紀律部隊嘅員佐級(老散)宿舍，入住嘅部門要跟部門人數按比例分配。所有住户只要到退休或上到公屋就要搬出。呢類宿舍好多私人屋苑 or 居屋都有，例如綠楊 & 油美苑等。較高級嘅以前有太古城、碧瑤灣等。
發表於 
返回列表
