好朋友心血來潮想嚟個台北3日2夜遊,剛巧又遇上 CX HOLIDAY 有超抵 PACKAGE,所以就一於立即行動!不過因為由決定到出發的日子時間不多,加上好朋友想遊覽台北一啲未去過嘅景點,所以我就決定搵返上次搵過嘅包車司機幫我地規劃其中一日路程。
今次主要想同大家分享一下可能係大家一啲平時比較少去嘅地點 - 桃園!桃園機場大家就去得多,但原來桃園亦都有好多地方可以遊覽,以下就係我去過嘅景點:
第 1 站:三峽老街
司機大哥一早 10 點準時來到酒店接我地,之後就載我地來到三峽老街
司機大哥仲話俾我地知,呢度最出名嘅就係「牛角飽」同埋「豬血糕」,不過我地只係食咗牛角飽,香噴噴,新鮮出爐最好味。
呢度成條街都係賣 D 特色精品,亦有民旅 FEEL 嘅衣服首飾,傳統食品,睇吓嘢又食吓地道小食咁,古色古香,感覺都唔錯呀!
(後記:上返車後,當司機大哥知道我地無食到「豬血糕」後,就話我地錯過咗一樣好好味嘅台灣地道食物,俾佢講一講後,我都覺得真係有少少後悔添!一場黎到,應該點都要試下!!)
第 2 站:鶯歌陶瓷博物館
我地去到門口,已經覺得座博物館好似藝術品咁靚!裡面展出嘅,全部都係陶瓷藝術品。博物館主要由玻璃幕牆做成,天花亦都係由玻璃所做,所以透明感極高,陽光都能夠透入博物館內,所以感覺好舒服。裡面除咗有介紹陶瓷嘅發展,由從前嘅人點樣去運用陶瓷,到而家發展成一門藝術外,仲展示五花百門嘅陶瓷展品,真係好大開眼界,估唔到陶瓷可以做到咁多嘢出黎,絕對唔單止係我地平時見到嘅花樽、杯杯碗碗碟碟咁簡單,如果大家有時間的話,一定要去參觀一下!
第 3 站:鶯歌老街
來到另一條老街,裡面賣嘅大部份都係瓷器,平貴都有,朋友本來想買一啲碗碟返香港,可惜我地只係帶咗個好輕便嘅旅行袋黎台灣,所以唯有放棄......
不過呢度都有一啲地道小食,我地就食咗個好好味嘅「紅豆餅」(朋友食完一個後,好食到要回頭再 ENCORE 多一個!)
仲買咗一份「脆皮雞蛋糕」,剛剛出爐拎出嚟食,真係外脆外軟,感覺有少少似食緊香港嘅「雞蛋仔」,不過一定要襯熱食,放耐咗就會變冧!
第 4 站:湖畔咖啡
行到攰攰地,司機大哥就載我地去一間好出名嘅「湖畔咖啡」,嗰度係喺慈湖附近嘅山上面,仲對住一座好似雙峰嘅山,所以呢間 CAFE 有個招牌咖啡叫做「雙峰咖啡」!
不過因為我比較想飲其他飲品,所以無試到招牌飲品!
坐喺呢度真係好舒服,環境清靜,而且又湖光山色咁,喺度食個 LUNCH / TEA 再加杯飲品,傾吓計... 都係一個非常唔錯嘅節目!
第 5 站:大溪花海農場
故名思義,就當然係嚟睇花啦!
我地都奇怪,呢個天氣,竟然仲可以睇到一片花海!!
去呢個農場,入場費要每位 NT$150,一行入去,已經被好似彩虹嘅花田吸引住,就好似去咗北海道一樣!
呢度有唔同嘅花,顏色鮮艷奪目,好多人都走入去花田度影相!
我最鍾意都係種滿薰衣草嘅紫色花田
如果行得攰,呢度仲有間餐廳可以坐低休息一下,又有精品店可以買一啲乾花香包或者其他乾花製成品返去!望到一大片花海,心情真係非常舒服呢!
第 6 站:愛情故事館
呢度有好多不同造型展板同埋模型供大家影相,據司機大哥講,呢度亦係一個影結婚相嘅熱門景點!如果情侶嚟到呢度嘅話,應該都會幾鍾意,呢度仲有個月老廟可以俾善信參拜呢!
另外愛情故事館裡面,亦有好多精美藝術品可以參觀,亦都可以喺度買手信,我地都買咗幾包牛奶糖返香港做手信!
第 7 站 (最後一站):大溪老街
來到另一老街,呢度感覺比較更地道,嚟行嘅都不乏本地人,賣嘅嘢種類繁多,但同之前兩條老街所賣嘅亦有所不同,所以我地可以睇到更多另類嘅嘢!呢度最出名嘅應該就係「麥芽花生糖」,有兩間舖都排哂長籠,可惜咁多人排隊,如果唔係我一定要買嚟試吓!!朋友就買咗包「黑金鋼花生」,試食過都幾好味,同香港食到嘅唔同,好香口呢!
行完以上咁多行程之後,司機就載我地出機場,要搭飛機返香港啦!呢一日嘅行程,雖然要行嘅路比較多,不過就睇到更多台北嘅另一面,可以參觀到更多地道而有特色嘅景點,所以我同我朋友都非常滿意同開心呀!如果大家都唔想再去九份十分平溪的話,不妨考慮一下去桃園呢!
若果需要行程資料的話,可以 PM 我!!