想生BB 今日: 9 | 主題: 109094

積分: 2705

42^#

發表於 21-7-21 06:29 |只看該作者

左照照右照照，醫生今次照咗好耐，隔咗一陣佢就話今個cycle暫時見到有2粒比較大，不過又有幾粒細細粒走咗出黎，呢個現象有啲奇怪，唔知係咪因為轉咗另外一種藥嘅關係！所以醫生就叫我兩日後再返去照清楚啲，到時候再決定幾時抽出黎。

結果兩日後我又再返去照多次陰超，一邊照醫生就一邊係個mon 度解釋話我知我今個cycle有啲特別，有2粒比較大，不過又有大概10粒細細粒嘅卵泡谷咗出黎！（佢好驚訝！）佢話咁耐以嚟未見過我有咁多粒卵泡。醫生話唔想嘥咗佢，於是決定今個cycle 同我用Duo collection 嘅方法，一個cycle抽兩次！（吓！咁邪？！先兩日至係啲討論區入面見到有人用Duo collection 嘅方法去抽卵，三個月抽五次卵，估唔到呢個方法會用係我身上喎）

醫生就解釋，呢個方法其實並唔常用，而佢自己亦都係試過一兩次。其實呢個方法都好有難度，因為第一次抽卵嘅時候只係可以觸碰嗰2粒大嘅，唔可以觸碰到其他卵泡，如果唔係啲卵泡就會爆哂出黎，咁到其時就乜都冇哂；而當抽完嘅第二日我又要再繼續銡針直至到另外嗰10粒嘅卵啱size先可以抽出黎。就係咁醫生決定喺4日之後先抽第一次。

好啦，嗰2粒夠大啦，喺時候要抽出嚟啦。同之前一樣都係全身麻醉之後抽卵，唔知係咪知道就黎唔哂再抽卵，心情好輕鬆，乜都冇諗。（諗嘅就只有係，就黎做完啦，之後可以擦餐勁啦！雖然自己冇話特別介口，但係有啲馬來西亞嘅美食我都盡量可免側免，例如肉骨茶，始終入面都有藥材嘛，怕有影響。）

話咁快又抽完卵啦，觀察完同血壓正常之後就去咗見醫生。醫生話剛剛抽卵好成功，可以抽到淨係佢想要既嗰2粒（最大嗰2粒）其餘嗰啲冇爆到，仲好好（因為怕打咗嗰支破卵針會影響到細嗰啲卵）跟著佢就吩咐聽日我要繼續準時打之前份量嘅針，希望過多幾日等嗰10粒夠size嘅時候就可以一次過抽哂出黎啦。

待續……

私人傳訊回覆引用

rabbit2baby

積分: 589

43^#

發表於 21-7-21 22:09 |只看該作者

Ihyl 發表於 21-7-21 06:29
左照照右照照，醫生今次照咗好耐，隔咗一陣佢就話今個cycle暫時見到有2粒比較大，不過又有幾粒細細粒走咗出 ...

私人傳訊回覆引用

sarahskbb

積分: 767

44^#

發表於 21-7-22 02:30 |只看該作者

Ihyl 發表於 21-7-21 06:29
左照照右照照，醫生今次照咗好耐，隔咗一陣佢就話今個cycle暫時見到有2粒比較大，不過又有幾粒細細粒走咗出 ...

私人傳訊回覆引用

積分: 2705

45^#

發表於 21-7-22 06:35 |只看該作者

到咗第二日，胚胎專家嘅電話又到喇，佢話尋日抽嗰2粒全部成熟已經受精，亦都開始分裂。到咗day5會再打電話通知我胚胎狀況。

又過咗三日，我再返去見醫生照陰超，睇下啲卵泡嘅進度如何。醫生睇到啲卵泡時都表現出非常滿意，佢係電視螢光幕指出呢10粒卵泡嘅size都差不多，唔會話有啲大有啲細，全部都有15mm以上，所以醫生決定4日後再抽埋剩餘嗰10粒出黎？（嘩，我嗰刻聽完之後好開心又興奮，點解？！因為我終於都有10粒［雙位數字］嘅卵泡啦；另一方面嘅係我終於都可以唔使再打針啦！講真，雖然打針對於我黎講已經唔係話好辛苦，不過始終都痛嫁嘛。）

當知道自己4日後就會抽最後一次卵泡，除咗要訂機票返香港之外，我仲專登上網睇下邊度有好嘢食，好想試吓啲馬來西亞美食（榴槤、大樹菠蘿、串燒、燒雞翼、肉干同肉骨茶等等）嘩！諗起都想食呀！訂訂下機票突然間諗起，今日應該去到Day5 嫁啦喎，胚胎專家仲未打電話黎，唔通又衰咗？諗下諗下電話就突然響起！終於等到胚胎專家電話喇。佢話嗰2粒embryos 已經去到Day 5，一切正常，係Good grade，剛剛send 咗去做PGS，報告一出我哋會再聯絡你。（嘩，好開心呀！原來唔係衰咗，我終於都再有胚胎可以去做PGS啦！）

不過到咗抽卵嘅前一晚，下面突然間見紅（吓，黎M?唔係掛，唔係打緊針冇M嘅咩？雖然流血嘅情況唔係好犀利，不過我超擔心，唔知會唔會影響聽日抽卵泡，我成個人嘅心情又再一次擔心同憂慮！攪到成晚都瞓唔着，喺張床度眼光光等天光。）

待續…

私人傳訊回覆引用

普羅旺斯

積分: 1770

46^#

發表於 21-7-22 20:11 |只看該作者

睇到你的分享好感動，真心好佩服你兩公婆既心理質素同埋有咁多錢做ivf🙈。而我自己試過一次iui比你簡單得多，已經覺得心累。期待你的分享，唔介意可以分享埋生產過程到照顧架，對孖b好感興趣

私人傳訊回覆引用

積分: 2705

47^#

發表於 21-7-22 22:58 |只看該作者

本帖最後由 Ihyl 於 21-7-24 05:54 編輯

普羅旺斯發表於 21-7-22 20:11
睇到你的分享好感動，真心好佩服你兩公婆既心理質素同埋有咁多錢做ivf🙈。而我自己試過一次iui比你 ...

謝謝你嘅支持，因為我個故事實在太長

比啲時間我，我會慢慢咁寫直至到孖B出世同佢哋出世之後所發生嘅事

私人傳訊回覆引用

積分: 2705

48^#

發表於 21-7-23 06:22 |只看該作者

由於瞓唔著，所以就早咗出發去診所，一到咗診所我就即刻同姑娘講我好似黎咗M，下面見紅。姑娘就好緊張咁叫我等一陣，佢即刻去通知醫生，隔咗一陣姑娘叫我先去凖備然後係手術室等醫生。

好啦，所有嘢準備就緒，姑娘就叫咗我個名入手術室，而我老公就做佢嗰part（其實我每次入手術室抽卵嘅同時，我老公都會同步去取精，保證所有嘢都係‘新鮮’）不過今次入到手術室有啲唔同，麻醉師冇即時同我做麻醉，等咗一陣醫生就到，佢即時同我跟進返究竟點解會見紅（因為正常用緊藥係唔會黎M），問咗幾個簡單嘅問題，麻醉師就開始同我麻醉，我好快就瞓著咗喇。

今次其實都抽得好快（前後大概一個鐘頭左右就完成，我就開始醒番。姑娘跟著入黎檢查咗血壓之後就同我哋講今次抽咗8粒，（雖然冇抽哂10粒，但係我已經好開心啦）姑娘跟著就講醫生轉頭會見我，叫我抖一抖等一等佢。等咗半個鐘左右，醫生就到，佢話剛才係抽卵手術之前已經同我check咗究竟係咩原因見紅，原來有粒瘜肉喺度！不過喺手術期間亦都一齊清除咗，應該冇乜大問題。

而且今次嘅成績好好呀，一共抽到8粒，剩餘嗰2粒嘗試咗好幾次都沖唔到出，不過唔緊要啦，今個cycle抽出黎嘅數量已經多過哂上兩次加埋。同埋應該係之前另外嗰個醫生開嘅補精藥對先生都起到作用，先生啲精子嘅活躍度同型態都有改善，希望今次可以搵到粒正常嘅blastocyst 啦！

待續……

私人傳訊回覆引用

積分: 2705

49^#

發表於 21-7-24 05:57 |只看該作者

到咗第二日，喺我正準備出發去機場返香港嘅時候，胚胎專家嘅電話就到。佢話噚日一共抽咗8粒卵，不過只有4粒係成熟，另外嗰4粒未成熟。未成熟嗰4粒，已經放咗落營養液到培，希望培養到佢哋成熟。而成熟嗰4粒就全部受精，不過只係得一粒分裂正常，其餘嗰三粒就分別分裂為2.1，2.2同8！（吓！有係咁？唔係呀嘛！又分裂埋啲2.1，2.2出黎？莫非想儲齊一套2.1，2.2同2.3？［苦中作樂］）

至於唔成熟嗰4粒會継續跟進。又隔咗一日，胚胎專家再打電話 update我，佢話唔成熟個4粒都全部受精，只有1粒唔正常，分裂咗做16，其餘嗰3粒都分裂正常。（嘩原來我嗰啲分裂咗嘅蛋蛋真係乜都有，1變2、1變4、1變8、1變16，仲要有集齊咗一套嘅2.1，2.2同2.3添！唔做過Ivf 都唔會知係咁，唔怪之得自己想自然‘有’會咁艱難啦！）

因為我宜家8粒受精卵入面得4粒係正常分裂（即係又得返一半），胚胎專家再次同我確認如果全部都可以去到 Day 5做blastocyst，問我想要攞幾多粒去做PGS！跟住我就同佢講之前有2粒拎咗去做PGS都未有報告，我暫時答唔到喺咪要攞哂去做PGS呀！隔咗一陣，胚胎專家同我check返之前PGS嘅報告，佢話上一輪PGS剛剛有報告（比預期中早咗成個星期），報告顯示嗰2粒嘅PGS一切正常……係pass。（吓！你講真嫁？唔好同我講笑喎！）跟住我問佢知唔知道係男仔定女仔（純粹八卦同好奇），點知佢好爽快咁就答我……兩個都係男仔。（OMG！我係咪發緊夢呀？真係pass咗？真係兩個仔仔？OMG!）我冷靜咗之後就同胚胎專家講不如睇埋呢一輪究竟有幾多粒可以去到 Day 5先至再決定拎幾多粒去做PGS啦。

就係咁，一個星期之後胚胎專家又再打電話黎同我跟進。佢話我第二輪所抽嘅嗰8粒卵入面到最後只有3粒係可以去到 Day 5 做 blastocyst，分別係有2粒 Good grade 同1粒Fair grade ，而其中一粒Good grade 就係較早前話分裂唔正常嗰粒2.1。佢解釋，雖然呢一粒起初分裂有啲唔正常，但係佢都可以去到Day 5做blastocyst 而且仲要係 Good grade ，（因為診所覺得既然佢都可以去到Day 5仲要係good grade，所以佢哋決定幫我送埋嗰粒2.1（免費）去做埋PGS，因為佢哋都想知道呢一粒blastocyst 正唔正常（醫院都從來未見過），結果佢哋就將3粒送哂去做PGS，然後再冷藏。

待續……

私人傳訊回覆引用

rabbit2baby

積分: 589

50^#

發表於 21-7-25 08:54 |只看該作者

Ihyl 發表於 21-7-24 05:57
到咗第二日，喺我正準備出發去機場返香港嘅時候，胚胎專家嘅電話就到。佢話噚日一共抽咗8粒卵，不過只有4粒 ...

私人傳訊回覆引用

積分: 2705

51^#

發表於 21-7-25 14:53 |只看該作者

時間過得好快，眨下眼又過咗兩個禮拜，終於等到胚胎專家嘅電話，PGS報告终於出咗喇！報告顯示Fair grade 嗰一粒喺第13、第18同埋第21對嘅染色體都出現問題（即係T13-帕陶氏综合症，T18-愛德華氏綜合症同T21-唐氏綜合症），屬於唔正常，所以呢一粒唔可以用！而另外嗰2粒Good grade嘅PGS報告都顯示正常，係 ‘Pass’！（我又八卦咁問咗究竟呢次係仔定係女）報告顯示2個都係女。（嘩！2個都係女！咁我咪即係有2個仔同2個女喺手囉！我係咪發緊夢呀？！OMG!）

冷靜咗之後就諗起，咦？嗰粒2.1都pass PGS？乜唔係唔正常嘅咩？胚胎專家話佢哋檢驗咗嗰粒胚胎嘅23對染色體，全部都正常，不過如果呢粒要做移植，佢會係最後嘅選擇，因為雖然佢嘅PGS係正常，但係分裂既時候有啲唔正常，所以就算移植咗入去之後，醫生都會幫你keep住check個狀況！詳細情形你可以喺凖備做移植之前約見醫生問清楚。

當知道個報告之後，我哋兩公婆就開始商量究竟幾時放返入去。（其實最快就係可以喺抽完卵黎咗2次M之後就用自然週期放返入去）因為老公總係覺得我打得太多針，連續4個cycle抽5咗次卵，成個身體都已經七勞八傷。之前我個中醫有講過，IVF打嘅針係好刺激個子宮，本身個子宮已經開始衰退，再谷到咁盡，咁快放返入去始終唔放心。所以都係等個子宮休息吓，返香港搵阿中醫調理好返個身體先做植入，順便用啲時間去儲返下啲銀蛋先。（雖然喺馬來西亞做Ivf係平過喺香港同加拿大好多，不過話哂我喺馬來西亞都抽咗成4次卵再加埋做咗6粒PGS，講真做咗咁多次就算平極都使咗幾拾萬啦［每次都要2～3萬馬紙］！我又唔係富貴人家，我同老公之前辛苦儲落啲銀蛋其實都差不多用完，為咗要阿B，我都要返工飛多幾轉去儲返下啲銀蛋先可以再去做移植。）

待續……

私人傳訊回覆引用

積分: 2705

52^#

發表於 21-7-26 06:57 |只看該作者

咁辛苦先搵到4粒Good grade而且又Pass咗 PGS嘅胚胎，其實都只不過係行咗整個過程嘅1/3。而喺呢1/3過程中，我覺得PGS呢個test係必需要做嘅，由其好似我呢啲高齡、AMH又低而且又開始卵巢衰退嘅女士。見到啲JM講，醫生話得1～2粒唔使做啦，做咗如果check到有問題嘅話到時就乜都無。其實我覺得咁講都幾不負責任，跟本就係為咗有卵植入而講。做test要錢，植入手術一樣要錢，咁點解唔check咗正常先植入呢？粒卵嘅基因正常，乜唔係成功率高啲咩？唔通無做PGS植入失敗咗之後，JM再做下個cycle果陣嗰啲醫生會俾折扣咩？（純屬個人意見）因為我主診醫生講過，如果胚胎係基因正常，以我嘅年齡（當時已經39）成功率都有80%以上，所以點解我（就算每次都係得1～2粒）都會拎每一粒Day 5嘅 blastocyst 去做PGS。

講個秘密你哋知丫，其實本身我哋選擇做PGS嗰時係冇諗過會知道粒胚胎究竟係男定女，雖然我呢間ivf診所係可以比你揀生仔定生女，但其實個PGS報告原來已經知道埋係男仔定女仔（老實講好多地方嘅胚胎專家或者醫生就算做咗PGS都唔會講比你知係男仔定女仔，所以我哋知道係男仔定女仔其實係一個bouns）

不過，就算有啲JM産量多嘅，我覺得都應該抽幾粒grading 好嘅去做PGS，因為就算經驗幾好嘅胚胎專家或者醫生都只不過係靠肉眼睇粒胚胎外表嚟去分grading，佢哋無透視眼可以睇得穿嗰粒胚胎究竟入面有冇基因問題。

另外，我覺得香港嘅IVF中心，喺培養胚胎方面同外國有好大分別，香港無論公家或者係私家嘅都會將Day2/Day3嘅卵做植入，又或者冷藏。而我之前喺加拿大或者馬來西亞嘅診所，佢哋全部都要培養到Day5 blastocyst先至會用嚟植入或者冷藏。

而且喺香港做Ivf 嘅JM，一般有過幾次失敗嘅經驗之後，醫生先至會提議佢哋去做PGS。（Why? 點解唔一早講清楚有呢個offer，然後俾啲JM自己揀呢？由其是啲高齡或者係有卵巢衰退嘅JM) 失敗咗先講，可能係粒胚胎基因有問題，所以流産，做下一個cycle果陣我哋驗埋PGS啦。（喂呀，早講吖，醫生）不過，就算會做PGS，個程序都好奇怪，竟然會係先冷藏，等JM決定做PGS先再去解凍，然後再攞去抽組織驗，跟著又冷藏返，最後等結果。驗完Pass嘅先又再解凍去放胎。咁玩法，蛇都死啦，何況係個粒胚胎。

我主診醫生講，就算佢哋診所嘅技術可以做到解凍後，保證胚胎質素跟冷藏前一樣grading 都好。佢哋都只會係雪一次，所以每粒受精卵培到第5日就會攞去做PGS（事前已經決定），之後再冷藏，直到移植放胎先會去解凍。

睇過咁多討論區，聽咗咁多JM講香港IVF嘅程序，好明白JM嘅無助。講真，我哋兩公婆真係無咁多時間，財力同埋精神去再慢慢試。而且，我嘅心理同生理上都未必承受到小産所帶嚟嘅傷痛（經歷過小產嘅JM應該好明白）宜家難得有4粒正常嘅胚胎，之後嘅步驟真係不容有失，就係咁我老公決定要我起碼休息最少半年先放胎，呢半年一方面盡量調理身體，另一方面，老公就繼續上網搵資料去深入了解其他導致失敗嘅原因，希望可以盡量避免流産嘅可能性，確保萬無一失。

待續……

私人傳訊回覆引用

積分: 2705

53^#

發表於 21-7-27 06:09 |只看該作者

於是喺五個月之後，趁住我有一個星期假，我就飛咗去馬來西亞一轉去見醫生，順便去攞埋啲針藥同問埋之後做移植嘅流程作出凖備。一見到醫生，佢就話做咗咁多次，終於都搵到正常嘅blastocyst 啦，仲要有4粒，而且呢4粒都係Good grade，成績唔錯！好啦，最困難最艱難嗰步已經告一段落，接著落嚟就係睇下我想要幾時放返入去同埋放幾多粒啦。（老實講，之前試過咁多次都係失敗，我自己的確有啲心理陰影，好驚今次又唔得！）

我就同醫生講：‘我諗住過多三個月先至放番2粒入去，因為三個月之後我先至有三個星期嘅大假放。’
醫生返問番我：‘你肯定想放2粒？如果放2粒就好大機會係孖胎嫁啦喎？你想要孖胎？’
我就話：‘因為我之前都係放開2粒嘛，2粒唔係成功機會會大啲咩？’
醫生就笑住講：‘你係咪想放一個男仔一個女仔呢？（哎喲，比醫生睇穿咗，比佢估到添！）其實你放幾多粒都只係一條好簡單嘅數學題，因為放2粒嘅話，能夠成功嘅機會率一定會係高過放1粒㗎啦，而且你所有胚胎都已經做哂PGS仲要係正常，所以成功率會比冇做過PGS嘅再高啲！不過就要有陀孖胎嘅心理準備，因為當你陀到去6個月嗰時，個肚就會好似人哋陀住單胎嘅9個月咁，差不多就嚟生得咁大，會比較辛苦，如果你都覺得冇問題嘅話當然可以放2粒啦。我諗咗一陣，我都係決定放2粒，我想喺機會率同成功率高嘅情況下放，希望有個好結果！

與此同時，我老公亦問咗醫生，有無需要做埋ERA/免疫系統嘅test？醫生就好有耐性咁解釋，其實check ERA主要係搵最合適嘅植入時間，而且外國有報告講，少於30%嘅女士子宮容受性有異，植入時間有機會影響胚胎著床。另外，免疫系統失調嘅病人自身免疫細胞亦都有機會攻擊胚胎，不過我之前都有試過成功著床（只係唔好彩小產咗），所以唔似有以上兩個問題，既然係咁就唔好浪費金錢去做呢兩個檢查。如果真係擔心免疫系統問題嘅，喺植入嘅時候，會開藥嚟幫我做好預防嘅準備。

聽到醫生咁講，我哋兩公婆都放心咗。最起碼，我哋擔心嘅問題係有解決嘅方法。（既然醫生都話唔哂做，咁我就唔做啦，我又可以慳返啲錢嘛）

待續……

私人傳訊回覆引用

xlin69

積分: 576

54^#

發表於 21-7-27 23:06 |只看該作者

加油樓主，你嘅經歷真係有血有淚，好彩我有朋友去咗兩次台灣就成功左，都明白箇中嘅辛酸真係外人唔會知

私人傳訊回覆引用

積分: 2705

55^#

發表於 21-7-28 05:49 |只看該作者

好啦，好啦，我終於都有胚胎可以放返入去啦，回想返喺呢整整15個月嘅尋醫過程裏面，我覺得搵到一個好醫生係好好好重要（傻的嗎？！其實個個都知啦，如果唔係做乜咁多JM求介紹喎）當然，今時今日，上去啲討論區問吓就知道邊個醫生口碑好；就算唔問，睇下分享都會略知一二啦。但係，大家睇分享嘅時候，通常都係見到講話邊個邊個醫生細心，我做咗一次就得咗喇，口碑好好。不過就無乜聽到講話邊個醫生技術有幾好？

當然，我換咗咁多個醫生，換返嚟嘅心得就係要搵個用藥準，手勢好嘅醫生去幫你做。用藥準確，谷得啲卵成熟，都要手勢好同抽得哂出嚟先至得。就好似我之前咁，明明有7粒，最終抽得2粒，嗰個心情，外人係唔會明嘅。如果連用藥都唔準，谷黎谷去都谷唔大又唔熟啲卵，抽卵有幾叻都無用啦！喺咪？（所以其實我自己好感激我喺馬來西亞最後幫我嗰一個醫生，就連我喺加拿大嘅屋企人都話呢個醫生係 ‘好好醫生’！）

但係，另外一個心得我覺得更加重要嘅就係，JM要多啲同醫生溝通，要識得問醫生問題，你識問，醫生先會講多啲。呢一點往往係做第一次IVF嘅JM比較輸蝕，因為見到個醫生真係唔知問佢乜好，又或者係個醫生超忙，好快就咁睇完個症然後就叫你要點點點之後就同你講bye bye…根本就冇時間俾你去發問問題。所以，要了解成個Ivf 嘅過程真係好緊要，有啲咩test可以做（PGS/PGD/ERA/免疫失調)，啲test做完係有咩作用？自己有無需要去做呢？真係要同個醫生溝通清楚先至會知！我哋都係從多次嘅失敗當中學習（而我感恩嘅係，好彩我老公肯陪我一齊行，因為好多時好多問題都係我老公問醫生嘅）

待續……

私人傳訊回覆引用

laiacodina

積分: 581

56^#

發表於 21-7-28 22:19 |只看該作者

xlin69 發表於 21-7-27 23:06
加油樓主，你嘅經歷真係有血有淚，好彩我有朋友去咗兩次台灣就成功左，都明白箇中嘅辛酸真係外人唔會知 ...

我帶個朋友都係台灣成功，為去台中茂盛醫院，指明要搵李茂盛院長出手，可能係院長出手，放第二個胚胎就成功

私人傳訊回覆引用

rabbit2baby

積分: 589

57^#

發表於 21-7-28 23:56 |只看該作者

Ihyl 發表於 21-7-28 05:49
好啦，好啦，我終於都有胚胎可以放返入去啦，回想返喺呢整整15個月嘅尋醫過程裏面，我覺得搵到一個好醫生係 ...

私人傳訊回覆引用

積分: 2705

58^#

發表於 21-7-30 06:49 |只看該作者

本帖最後由 Ihyl 於 21-7-30 06:55 編輯

其實喺呢5個月入面，我好勤力咁返工，除咗要搵返啲銀彈之外，我仲要無停過去睇中醫調理身體。之前都有提過，我係一個外站空中服務員，長居英國，要睇中醫就要靠每次飛返香港停留嗰一兩日去安排。所以呢5個月我平均每個月都會飛4轉返嚟，差不多一星期一次。啲同事都問我飛咁密做乜？係咪想見多啲老公，要小朋友呢？我當然無講咁多啦，笑吓就算數，因為我知道身邊都有好多同事結咗婚好耐都未有小朋友，如果我講咗，應該都會有好多人嚟問我。不過，個IVF療程都未完成，就算要分享既都等成功咗先啦！

就係咁，嗰5個月就不停飛，不停睇中醫，不停食中藥同做針灸。但係我老公都仲係膽心睇中醫唔夠，仲要我飲同食其他supplements ，好似話乜嘢核酸飲品，乜嘢NMN，仲有啲乜嘢仙人掌berry呀！唉總之，抗衰老嘅，有益嘅都試，期望喺呢5個月裏面盡量改善身體狀況。因為到咗要植入嗰陣，萬一個子宮唔夠厚嘅話，一樣又係冇得做，到時候又要再等！

好啦，唔經唔覺下個月就放大假啦，即係今個月就要開始食藥同預備塞藥為移植作最後準備。每日重複又重複，食完就塞，塞咗又要瞓床成個鐘頭，不過點都好過之前抽卵嗰陣，起碼唔使要日日咁銡幾針。終於都嚟到ivf 療程嘅最後一關，就係要移植番入去喇（我係喺九月初做移植嘅）。移植前幾日就已經飛咗去馬來西亞，今次好彩係住喺朋友屋企，有家嘅感覺，個心情都輕鬆啲。仲有幾日時間，梗係要食盡佢啦，做咗大肚婆之後，好多嘢都唔食得（榴槤，沙嗲，肉骨茶……）

飲飲食食咗幾日，終於到咗移植日喇，今日一早就返咗嚟診所；喺移植之前，胚胎專家同我核對完個人資料之後，再三同我確認我總共有4粒胚胎。而今次會係移植2粒胚胎～一粒男仔（grading 係6AB)，一粒女仔(grading 係5AB)！確認好同簽哂啲文件之後，我就要開始搏命飲水去凖備移植喇。姑娘話要飲到急急地，膀胱脹咗先至可以移植。（脹咗照陰超放胎）

換好哂手術衫，我再一次踏入去手術室，不過今次間手術室有啲唔同，唔係之前抽卵嗰間，而且亦都冇麻醉師喺度。護士只係不斷咁問我飲夠水未，急唔急，想去廁所未。當我話急喇，想去廁所，佢就話係時候放入去啦。主診醫生亦都入咗嚟，佢叫我放鬆心情就可以，睇嚟醫生都好有信心。胚胎專家再一次同我確認移植入去嘅胚胎數量，之後醫生又再同我確認多一次，然後就幫我插喉管。由於我先天性子宮後傾，醫生用咗啲好長好幼嘅喉管導入，我總係感覺有啲唔自然，有啲怪怪地咁。當醫生準備好哂所有喉管，佢就示意胚胎專家準備。胚胎專家佢make sure 嗰2粒胚胎已經完全解凍到一個合適嘅溫度，然後就馬上進行移植。隨着醫生慢慢咁將（阿仔同阿女）嗰2粒胚胎放入去我身體入面之後，咁就即係代表我造人之旅開始進入另一個階段！而漫長嘅14日等待亦隨即要開始喇！

不過喺等待呢14日之前，我就先要瞓係手術床上面等（因為醫生做移植嗰陣會盡量同我放嗰2粒胚胎去最接近子宮內膜嘅位置，希望可以比胚胎盡快黐實，所以佢吩咐要瞓喺床上面最少45分鐘，當然醫生就建議我最好係瞓一個鐘頭以上，等佢黐實啲）其實瞓係度等唔係問題，但係喺手術室入一面都有啲凍，而且下面又冇著嘢，攪到好想起身去wee wee，我忍咗15分鐘左右已經好想去廁所，但係姑娘話未夠鐘唔比我起身（嘩，咁樣攪發我會瀬wee wee嫁喎）我忍我忍我忍忍忍，忍到機乎連忍者小靈精都要走出來啦！忍下忍下都忍咗45分鐘，我終於頂唔順大聲叫：‘姑娘，我要去廁所呀！’（我就黎爆炸啦！）佢哋就即刻快快手咁走過嚟，慢慢慢慢咁扶我起身（因為我宜家係佢哋嘅眼中，移植完成之後，我就係一個大肚婆喇）不過當我去到廁所想wee wee嗰陣，唔知係咪忍得太耐谷得太耐，我竟然屙唔出！嘩，呢種感覺簡直畢生難忘（雖然我已經有過三次呢啲忍wee wee嘅經驗，不過呢次［第4次］係我忍得最耐嘅一次）好想屙但係又谷住屙唔出，急到爆炸呀！我谷得好辛苦，但係又唔敢用力屙。最後我要坐咗成5分鐘左右先至可以慢慢咁等佢自己慢慢咁滲下滲下咁流出嚟（唔係屙出嚟囉），我用咗成10分鐘先至覺得自己已經去得哂啲wee wee。可能我去廁所去得太耐，我老公仲以為我有啲咩事添。哈哈！

待續……

私人傳訊回覆引用

積分: 2705

59^#

發表於 21-7-31 07:53 |只看該作者

由於我老公怕我做完移植之後搭飛機返香港會有影響（雖然醫生冇講過會有問題，但盡量避免會有呢個可能性）所以佢決定唔比我同佢一齊番香港，要我係馬來西亞等埋呢14日，驗完血確定咗Bingo先再算。就係咁，我就走咗去搵我馬來西亞個朋友，我喺佢嗰度住住到等驗血。14日嘅時間雖然唔係長，但係呢14日對於做完移植胚胎嘅人嚟講就真係好煎熬！（曾經做過胚胎移植嘅JM一定會好明白）

雖然我已經唔係第一次去等呢14日，但係我嗰刻嘅心情實在太忐忑不安啦，我成日都喺度諗，究竟今次係咪真係會成功到嫁？差唔多乜嘢test 都做哂啦喎，如果又唔得咁點算好呀？我哋啲積蓄已經差唔多用晒，如果真係要再做過嘅話都要起碼等返一年半載先儲夠銀蛋至可以再做過，到時我起碼都41/42歲啦，再高齡啲咪仲難啲，唔通真係要認輸？！？

講真丫，放完落去第一個星期，我個身體真係完全冇咩特別感覺，但係去到第八第九日之後，我就發覺個胸好漲，谷到爆，就連’Hi‘吓都痛到想喊，我啲‘bra bra’都開始唔係咁啱着。之前我從來都冇試過係咁，我見個喼有幾支驗孕棒喺度（之前用剩嘅），於是我又心癢癢，又忍唔住走去偷偷地去驗！

嘩，一驗之下我好快就見到有兩條線！唔通中咗？！於是我就即刻打比老公諗住話佢知個好消息同佢開心share，點知老公就一盤冷水照頭淋咁話我：‘你唔好傻啦，乜你唔係喺第三日先返過診所打過支針咩，會唔會係啲針藥影響咋，你休息吓好過啦，驗乜鬼吖，諗咁多，過多幾日咪知囉！’（唉老公都話得啱，所有嘢都已經係注定咗，算啦，當我冇見過呢兩條線啦！）

待續……

私人傳訊回覆引用

b4connie