香港18區媽媽會 今日: 0|主題: 156882

下星期一就自行派彩，祝大家好運。唔得都唔好太失望，繼續努力，未到2015年9月都仲有機會。寫少少關於大抽獎嘢俾大家參考:

1) 大抽獎報名表格係統一派位中心到攞，唔係寄俾你。記住，邊個簽自行份表，大抽獎份表都係佢簽，唔係要有授權信代簽。

2) 如果已經有私校offer，你或者會收到教育局另外一封信，問你仲玩唔玩大抽獎。如果私校唔俾抽，會掉你入waiting list/收番你個位，咁就要掙扎做決定。唔好博懵諗住私校唔知，教育局同私校有溝通，一定知，去到大抽獎派彩時私校就會話你知你掉左你入waiting list，區內有私校就係咁做。

3) 教育局網頁有埋各間學校俾大抽獎既剩餘學額，留意下幾時放上網，可以計劃下大抽獎個排序。留意下有無學校今年要加開新班，我估有。如果想睇舊年/以前數據，可以上網搵下啲教育專家既網/blog/fb，我有見過佢地放上網，有啲仲擺幾年數據添。

4) 教育局既網有"小一入學報告書"，入面既appendix 有”小一入學各學校網學童派位結果概況"有講各校網舊年既派位情況，依家只有2013年報告書，2014年報告我估會臨近大抽獎報名時出，喜歡用數據分析既可以睇下，加埋新聞講既出生率/以前既成功率等等推估一下今年情況。

5) 11網有16間小學，男仔少兩間，除左2-3間俾人覺得差少少外，質素叫做平均但又位唔多。現實係各有捧場客，可能好多間係乙一已經收滿，唔係乙二都無咩位剩(除左個2-3間外)。大家可能要有心理準備，乙一唔中就有機會碌到好後。純粹個人意見，乙一揀間你最想去，唔博唔知運氣好，唔博條氣又唔順。乙二打後就揀接受到又位多既填先。

6) 最緊要係好運，講咩/做咩都無用，祝大家好運。

以上係過往經驗/個人意見，今年可能唔同左，希望對大家有啲用。