分享京都清水寺穿著和服之旅~
個個女仔去到日本都想試下著和服 (日文稱着物 - きもの), 而京都呢個身為古色古香既地方, 當然就最適合著住着物周圍閒逛啦, 而我今日就會分享下我係京都試著着物既經驗啦~
我就選擇左係「岡本織物店」租賃着物, 原因係因為就係清水寺既中心, 係清水寺就有2間店舖, 極之方便 : 着物既款式多而且新淨, 唔會殘殘舊舊咁 (不過かばん就有d會俾人用到甩左個手枕咁); 另外扒過好多文, 都有好多台灣既女仔推介 ; 同埋最特別既一點就係着物唔一定要即日歸還, 可以交俾自己住既酒店, 由「岡本織物店」既工作人員第2日到你住既酒店收返, 不過呢個服務只可以係京都市內既酒店限定同埋要另外收費, 你知啦, 好多香港人去旅行最緊係要快, 行程篇排得密密麻麻, 務求以最少既時間去最多既地方, 如果急住要當日歸還, 就唔可以去得太遠太多既地方啦! 另外當你著住一件着物既時候, 點捨得咁快就要除低佢呢? 而且, 日本好多地方好早就關門, 「岡本織物店」都唔例外, 要係佢關門之前就要除低歸還, 計下計下可以著既時間其實唔係好多。(所以我建議預約最早既時間, 差唔多佢一開你就去就最好啦, 好處之一係時間充裕, 可以著耐d ; 第二, 最早去當然有著數啦, 就係有最多最靚款式都係你揀先丫麻, 試諗下, 你中午先去, 有靚既款式都一早俾人揀哂啦~)
講下價錢先, 其實仲有好多間租賃着物既鋪頭, 價錢都差唔多, 唔係差太遠既, 而「岡本織物店」既價錢由3000円起, 不過3000円只係會包最基本既野, 而且款式既選擇當然會差d, 無咁多啦, 咁既然黎得京都又想著着物, 一生人一次, 當然要揀d好d啦, 係咪? 我自己就揀左5000円既[本格装いプラン], 着物服既款式選擇有600款咁多, 另外包襦袢, 白足袋, かばん, 帯, 帯かざり, 草履, 腰枕, 小物咁… (我自己都揀左好耐, 所以真係早d去好d~) 而呢個[本格装いプラン]亦係「岡本織物店」所推薦及最多人選擇既~
本來我地係預約左9:00係本店度裝身家, 我地好準時就去到, 正確黎講係早左到添, 但係唔知點解等極都唔開門, 男朋友就話行去清水坂店度問下, 因為都算好近既, 3個字內一定行到, 所以我地就一齊行去問啦, 去到問左話我地預約左但本店無開門, 咁清水坂店既工作人員就直頭俾我係佢間店度裝身啦~ (所以最好去清水坂店度預約穩陣d)
揀好着物既款式, 襦袢, 帯, かばん之後, 工作人員就會帶你上樓, 幫你著啦, 更衣室係一間好大既和式房間, 可以容納到5-6pair人, 一對一咁由負責幫你著着物既姨姨幫你, 不過記謹著着物同著浴衣係唔同家, 浴衣主要係輕鬆休閒同質料輕薄為主, 而着物一般都會幾層厚, 仲要塞毛巾添, 就好似以我為例, 我係冬天既時候去既, 本身諗住貼定d暖包可以保暖, 但姨姨就建議我唔駛貼暖包, 因為會好熱, 而事實上我又覺得真係唔凍喎 ; 另外就係通常着物都係會綁結綁得比較實, 即係會令你覺得似著緊身衣束衣個d感覺, 所以一定要叫姨姨唔好綁得太緊太實, 如果唔係你係會食唔到野, 食完都好想嘔既感覺, 就好似我咁, 我著到5點已經頂唔順要搭的士返酒店除哂佢。
好啦, 着物方面搞掂哂之後, 就輪到頭髮啦, 係佢呢度加500円就可以set埋一個著着物襯哂的髮型, 唔識日文, 點講要咩髮型? 唔駛怕, 佢地已經預備左一張餐牌, 餐牌上有4款髮型可以選擇, 只要指俾佢睇就可以啦~ 短頭髮既女仔都唔駛擔心會set唔到髮型家, 因為我都唔係好長頭髮, (我d頭髮都係剛剛到膊頭), 佢地d髮型師姐姐好犀利家, 而且佢地有個神級卷髮器, 只係一個好普通我地去髮型鋪電髮時既一個卷髮圈, 插係一個發熱緊既發熱器上面, 就可以三兩下手勢將頭髮由直變卷, set好髮型之後, 可以去旁邊既一角揀頭飾, 髮型師姐姐會幫你整埋上頭度就搞掂哂啦~
因為我去既時候係冬天, 所以我都搵番件外套著下, 另外如果唔想要外套既話, 都仲有毛毛被肩可以選擇。最後當然唔少得草履啦。完成啦~ 係臨走去街街既時候, 佢地d工作人員仲會幫你影低一張完成圖, 即日就可以係佢地既網頁上睇番添~