http://hk.apple.nextmedia.com/enews/realtime/20150609/53832977 | |||||||||||
戴夢夢同太極鼓手Ricky朱翰博噚日十指緊扣去中環置地嘆茶，明知置地「十面埋伏」仍然揀去嗰度high tea，無異於公告戀情。
由於Ricky早已結婚，且處理感情事一向低調，故外間猜測其婚姻狀態為何。方才Ricky接受《蘋果》電話訪問時，直認依家辦緊分居手續，但拒透露詳情，只表示:「我唔答啦，你哋睇啦，唔使再問。」又謂由夢夢解畫更好:「因為佢比較識講。我驚影響佢，我唔答喇，留番佢答，佢話係就係啦。」
夢夢接受本報電話訪問時，就直認:「發展中啦，冇幾耐，我又唔係幕前，唔想講太多。」問及可知對方結咗婚？夢夢謂:「我得知佢哋分開咗，依家係單身，所以我哋先發展吓。（佢已經搞清楚離婚手續？）分開咗，大家唔想呢樣嘢影響形象同發展，私人感情想低調處理。」
談及Ricky年紀比夢夢大好多，夢夢表示:「唔知呀，年齡唔係一個問題。（點樣開始？）咁鬼私人嘢（你哋唔同年代？）佢係前輩，唔關事，緣份嚟，都唔係好唔同年代，佢80年代，自己90年代。」
至於可介意對方曾結婚，夢夢表示:「呢啲唔答，總之許可情況下發展，（依家好開心？）以後唔去置地食飯，怕咗你哋，越大越怕畀人問私人嘢。（佢同你交代清楚？）係，畀啲空間，高抬貴手。（有冇畀契爺過目？）唔講啦，唔想太高調。（有冇諗過結婚？）去到咁遠，唔知呀，緣份好難講。」 
噚日下晝，大少林建名契女戴夢夢，被發現同一位高大型男齊齊戴住黑照喺中環出現，手拖手甜蜜蜜現身狗仔隊行咇熱點——置地廣場，雖然夢夢發現記者時有啲驚訝，不過仍然大方拖住手等安排入座，到坐低咗高大型男發現記者，就刻意轉身避鏡頭。呢個高大男，其實就係太極樂隊鼓手Ricky(朱翰博)。而Ricky，係有家室之人，係當年太極喺新加坡演出時認識女，一見鍾情，兩人拍拖一年就結婚喇。
依家夢夢同Ricky愛得咁高調，是否意味Ricky已然辦妥手續？佢今日接受《蘋果》電話訪問時話:「其實我都唔識答，放過我好嘛？（你結咗婚？）呢個可以答，呢個需要答，其實我哋分咗居，我搬開咗住一段時間，其他唔敢膽亂答。」
Ricky續道:「其實我一直唔係咁artist，唔敢膽亂答，但要講清楚婚姻狀況，其他都係好普通嘢。（點解離婚？係咪因為夢夢？）絕對唔係，戴夢夢0依家係大名娛樂，今次太極個騷，大名係投資者，好多年前有見過佢，戴夢夢嗰度唔講太多。」
發表於 
返回列表
