徇仔要求,復活節假期同佢去左一趟北京,四日三夜,本著化繁為簡,速戰速決嘅精神,覆蓋左主要嘅景點,算係還左佢心願。因有 jm 問詳情,現分享一下:
行程篇:
Day 1:早機去,中午時分到達,去酒店安頓後,先遊頤和園,三個鐘,走馬看花,都足夠
Day 2:長城 + 天壇。曾掙扎過應該去八達嶺還是慕田峪,最後還是決定八達嶺,因為比較近,配套設施也比較齊全,進可攻退可守,雖然人多,但唔係週末,還好。我地係坐纜車上南段,再行上頂,之後落山,再行上北段,至北五樓,阿仔話攰了,唔再上了,我地兩老如奉綸音,欣然一道落山。返到市區也不過一點幾,食過午飯,再去埋天壇
Day 3:故宮 + 景山公園。本來都預左故宮會多人,但冇諗到而家喺長安街就開始截人,去到故宮邊,先要過一次安檢;然後從天安門正門入,我地上左天安門城樓,呢度要分開買門票,同埋唔帶得袋上去,要寄存;入故宮再排一次隊買飛,裡面到處都人山人海,每個殿都只可隔著好多重人頭裝一裝,其實十分冇癮。行完故宮跟住去埋後面嘅景山公園,冇乜特別,有棵崇楨皇帝上吊嘅樹,行上山仔,可以眺望返故宮。本來仲諗住去埋北海/後海,但阿仔比人群逼左一朝,有 d fed up,話唔去了,於是我地返左酒店休息
Day 4:本來阿仔想去睇升旗禮,但經過前一日故宮嘅擠迫,話咪搞了,我地樂得訓晏 d,然後他他條條起身食早餐,執埋嘢出機場,中午機返香港,到屋企剛好晚飯
食物篇:
北京比較著名嘅涮羊肉同填鴨當然要食,涮羊肉係朋友請嘅,喺一間私人會所,我只負責食,唔知地址,唔知價錢,但睇環境同食物質素,應該唔平;烤鴨喺 Grand Hyatt 內嘅長安一號食,相當唔錯,另外朋友介紹一間叫 1949 嘅,話都好正,如果下次有機會再去北京會去試下;第一日去頤和園時,阿仔見到有冰糖葫蘆,話要食,結果嗰晚返去就嘔加肚瀉,超級保守兼緊張嘅老公就唔再準我地隨便喺街食嘢,我所有想試嘅小食(炸醬麵,餃子,等)都只可以喺酒店樓下商場內嘅餐廳或 food court 裡食,十分冇癮
整體來講,北京比我嘅印象比想像中好,比起中國其他城市,大氣好多,作為首都,氣派係唔一樣嘅。景點人多係必然嘅,打尖免不了,我實在忍唔住時,會出聲,大家都會收斂一陣,好少會橫蠻地鬧返轉頭,到底係天子腳下,多少有 d 文化。空氣污染仍然嚴重,阿仔一落機就狂打乞嚏,之後就開始咳,加上天氣乾燥,我地全家人喉嚨都唔舒服,一路飲住京都念慈庵頂住,我已經叫左工人來緊幾日日日都要煲湯,真係要潤返下