1. 睇下咩直私立自己心儀,邊間可以做 back up, in case 抽獎派寶。2. 留意幾時申請,點樣申請,幾時 first in。部份學校 K2 下學期已經開始。留意邊啲學校有第二輪申請。
3. 報學校之前都諗下間學校會唔會冇校車到/上車太早,如果冇校車自己又安排唔到接送,有 offer 都浪費。
4. 認清楚自己同小朋友鍾意/適合咩學校,例如小朋友系冇點谷過學術,報 SFA 同 APS 大機會浪費時間,佢地認筆試唔多認人。如果知道自己系放養,接受唔到考試、升中壓力的話,咁就避免揀啲對學術好注重/冇中學部嘅學校。
5. 唔好限死自己讀邊類型學校,例如小朋友學術都 OK 但唔係超班,都可以試下報 TSL、蘇小之類。亦唔好諗住自己小朋友已經操到好 fit,冇一兩間 “低少少” 嘅學校 back up。
6. 諗清楚 plan b, 即系 touch wood 全軍覆沒/面試撞到墜機導致冇 offer,可以點(隨緣、叩門?)。
7. 中文好重要,但好多直私都會用英文問問題,確保小朋友英文表達能力有返咁上下+有自信大聲英文答問題。
8. 雖然面試班未必有用,但俾小朋友 go through 幾次訓練,俾佢知道大概考咩,等佢唔好一去到面試就失算。同埋可以訓練埋小朋友分離問題。
9. 有時間最好俾小朋友行經應考學校(有 open day 就最好),有啲小朋友去陌生地方會嚇到喊,行多兩三次熟左個地方冇咁怕。
同埋最緊要:家長識放鬆同調節心態。考小系好大壓力,亦唔係學術好/多證書就大把學校收。唔好見到人有 offer 自己冇,就急定先。年年幾千人 in 一間學校,咁多小朋友面試時間又咁短,太多變數,老師走漏眼都唔出奇。小朋友會感受到你嘅情緒壓力,避免情緒失控而影響到小朋友心情同自信。