少年成長今日: 0|主題: 15863

收藏本版

發帖

返回列表

跳至頁

查看: 13576 | 回覆: 2

興趣班冇興趣 [複製鏈接]

csir3290

子爵府

積分: 11015

1^#

發表於 21-4-18 12:04 |只看該作者 |倒序瀏覽 |打印

公眾假期嗰幾日難得可以放假睇阿仔阿女練羽毛球，坐喺場邊睇住佢哋打波就咁過咗兩個鐘頭，期間同教練傾開偈，佢話好難得家長肯坐喺場邊陪自己對仔女睇住佢哋練習，咁我話平日因為要返工但係都只能夠盡可能喺佢哋練習完之前趕嚟接佢哋放學順便睇吓佢哋，所以都好想趁放假嘅時候睇下佢哋練習。教練話好多時家長就係忽視咗一個咁細微嘅行為，家長以為送個細路仔去學一個興趣就咁放低咗佢就可以，其實要細路仔維持一個興趣，要畀細路仔覺得家長係陪佢哋一齊同支持佢哋好重要。佢話見過有啲家長，雖然係坐喺場邊但係由頭到尾大部份時間都係望住個電話根本就唔知個細路仔打成點。不過佢話咁都算好，起碼個家長都喺側邊睇吓個細路仔，都好過有啲從來都唔出現只係靠個工人管接管送。教練話尤其是係細路仔啱開始學一種興趣嘅時候，如果家長肯多啲陪佢哋一齊，佢哋維持到落去嘅機會就越大。

另外，一個好多時令到啲細路仔越的越冇興趣嘅原因就係家長嘅壓力太大，咁呢個我都認同，好多時家長叫個細路仔去學一樣嘢嘅時候，就期望佢喺嗰樣興趣入面可以參加比賽或者去攞啲乜嘢獎，以為咁樣就係學得好，點知反而會畀咗壓力細路仔。其實我成日都講興趣就係興趣同攞唔攞到獎或者成績係另外一件事，只要細路仔覺得嗰樣嘢係好玩係開心佢先至會有興趣繼續學落去，就算開頭覺得好玩開心，但係當壓力越嚟越大嘅時候只會令佢哋唔想玩。咁我唔係話要佢哋比賽係唔啱，但係所有嘅比賽都應該係佢自己想參加而唔應該係由家長要佢哋參加。當個興趣一路發展落去，去到一個比較穩定嘅階段嘅時候家長就可以同個細路仔商量為自己設定一啲目標，因為當個興趣內化咗嘅時候其實目標就係維持呢個興趣繼續落去嘅一個元素。

好似我對仔女好細個都已經開始學游水，開始嘅時候都係因為我哋兩公婆成日同佢哋去泳池玩，玩到佢哋鍾意而佢哋又想先至開始學游水，學咗幾年亦都已經學識曬，但係點解之後會停咗冇練而轉咗玩羽毛球，一個好主要嘅原因就係因為每次去到練習佢哋都已經覺得開始悶，因為佢哋又未去到話可以比賽攞獎嘅水平，每次去到練水都係不停咁練，但係又好似冇乜嘢目標咁，有陣時連我個仔返到屋企都話好悶，有陣時細路仔學嘢就係咁，去到個階段佢都覺得自己冇乜進展只係好似一個習慣咁練，咁就不如轉下。咁其實轉打羽毛球另外一個原因就係因為我同老婆都識打，可以當自己都做下運動一個禮拜同佢打一次。教練就話正正就係呢個原因係維持細路仔興趣嘅一個好主要嘅原因，就係父母有同佢哋一齊玩。其實要維持細路仔嘅興趣一啲都唔容易，開頭嘅時候要佢哋覺得冇壓力又要父母一齊陪，最緊要嘅仲要同佢哋一齊玩又要識得欣賞佢哋，咁個興趣先至可以慢慢發展落去，開始喺佢哋心入面發芽成長。其實學乜嘢都係千祈唔好拔苗助長反而適得其反。因為興趣始終都係話由玩開始，要玩得開心先至有興趣繼續玩落去。