少年成長今日: 0|主題: 15865

收藏本版

發帖

返回列表

跳至頁

查看: 15499 | 回覆: 0

揾節目 [複製鏈接]

csir3290

子爵府

積分: 11024

1^#

發表於 23-1-8 12:20 |只看該作者 |倒序瀏覽 |打印

襯聖誕假期除咗公眾假期嗰幾日外，特登攞咗三日假陪下啲細路，但係老婆公司太忙所以攞唔到假，終於聖誕公眾假期之前就變咗得我同埋兩個細路仔放假。我雖然放假但係公司都仲有嘢要做，所以每一朝早起身都係先完成公司啲嘢，同時亦都係維持一個生活習慣俾細路仔，起咗身食完早餐都係同我一樣大家做各自嘅嘢，佢哋就做功課我就做公司嘢。其實都係刻意維持呢個習慣，就算放假都好佢哋學校都有功課，所以都係朝早做功課同練琴做完先至玩。其實呢個都係維持佢哋生活習慣嘅做法，所以佢哋都習慣咗就算放假起咗身都係做咗功課練完琴然之後先至開始玩。

由於老婆冇假放就變成得我同啲仔女一齊，我唔想浪費咗啲呢啲相處嘅時間，所以都要諗下節目同佢哋去吓街。有啲家長可能會覺得放假係咪有需要一齊出街呢？尤其係啲仔女越嚟越大個，佢哋都未必願意同家長一齊出街。但係我嘅諗法就正正相反，既然到佢哋越嚟越大個可能遲啲都未必咁鍾意跟埋家長一齊出去嘅時候，趁佢哋而家仲願意同我一齊出街，就要爭取多啲時間多啲同佢哋一齊相處，講真就算一齊喺屋企，可能有陣時都唔多傾計，各自做自己嘢，與其係咁不如家長用下心機諗下啲地方同佢哋一齊去一齊多啲經歷仲好。終於其中一日我哋就去咗行啱啱開返嘅海防博物館，之前我對仔女都好鍾意去，但係因為颱風「山竹」之後，足足閉館咗兩年冇去到，趁佢啱啱開番即刻就同對仔女再去，嗰度其實好適合一家大細去行，有戶外嘅地方，又有室內嘅博物館部分。咁又可以消磨半日當中唔需要特別搵話題都大把嘢傾大把嘢講。另外一日就同佢哋去咗行新嘅跨灣大橋，跟住再去接老婆放工。

其實特登要搵地方同佢哋去並唔係只係為咗去街咁簡單，其實係透過呢啲相處嘅時間，大家可以搵到唔同嘅話題去傾，我成日都講有啲家長成日話仔女唔同佢哋傾偈，其中好主要嘅原因就係平時家長唔同佢哋傾閒偈，要平時同仔女傾開偈，仔女先至會習慣事無大小都同家長一齊傾一齊講。有啲家長成日都以為問問題而仔女答咗就叫做傾偈，所以仔女除咗答家長問題之外，其實係冇其他嘢同家長講，但父母就會覺得仔女唔肯同佢哋溝通。正正喺好多家長嘅概念入面，溝通只不過係答問題，總言之家長問乜細路仔就要答咁就有溝通，如果細路仔只係慣咗答問題式嘅溝通，咁細路仔有點懂得講自己嘅嘢呢？所以多啲同細路仔去街，期間就必然搵到唔同嘅話題去傾，不過大前題係當然大家都要放低自己部手機啦，所以可以嘅話做家長嘅多啲諗下同細路仔去唔同嘅地方發掘唔同嘅話題，自自然然其實同細路仔溝通就變得冇難度。千祈唔好覺得同細路仔去街好麻煩，反而做家長嘅應該要珍惜細路仔仲期待同自己去街嘅時間，好好地同細路仔去溝通相處，其實就係為咗將來大家有良好溝通關係而打好基礎。所以我非常之珍惜同仔女自己相處嘅時間。做家長應該好好珍惜細路仔仲肯跟自己去街嘅時間，珍惜同佢哋一齊相處嘅機會好好溝通。

0 0 0

私人傳訊

跳至頁

返回列表

上一主題 • 下一主題

回覆

發帖

頻道

討論區

熱門搜尋：

少年成長 今日: 0|主題: 15865

少年成長今日: 0|主題: 15865