論盡家傭今日: 0|主題: 133732

收藏本版

發帖

返回列表

跳至頁

查看: 2303 | 回覆: 1

點解要怨我？！我又要怨邊個？！ [複製鏈接]

wan-wan-ma

別墅

積分: 574

1^#

發表於 07-11-17 02:33 |顯示全部帖子 |倒序瀏覽 |打印

上個月尾工人個妹打電話黎話urgent搵家姐，我無問原因出糧時主動advance左一千蚊過佢。上星期晨早有電話搵工人，原來佢老豆過左身！我又主動同佢講妳有七日大假（佢剛做滿一年！）決定幾時返去要話我知。

點知過左一日佢笑住口同我講，如果要走，需要6千蚊！我話等我打長途電話同老公商量先，點知C6話無意見:tongue: ！我呢頭收線果頭佢就即刻好緊張問我阿Sir點話？我唔知點落台！事關銀根好緊，自己又先開口叫人放假，人地依家開到聲，無辦法都要諗掂佢！於是我準備借俾佢只係想問聲佢會點還。（其實我自己已打算叫佢每月還一千蚊，唔得就每月五百還足一年。）

點知佢曝露左一個錯愕表情，接住口快快話唔返去都得但係要借二千五俾阿妹帶返去。於是十一月成份糧就咁俾晒佢。我素黎都鍾意諗野，但速度較慢。我自己係到諗：點解死老豆咁大件事，老細放妳走（我一個女人湊住三個）都可以唔返佢！問佢點還六千蚊又一臉錯愕急急轉話題？奇怪，真係好奇怪！

我諗左一陣，試下將六千減二千五，得出一個好敏感o既數字：三千五百蚊（即一個月人工）我即刻明白，佢根本想借意問多一個月人工然後唔返黎！（事關上年佢已講過兩次話唔撈，跟住又話無錢俾一個月通知金，我見佢要供個女讀護士，我又好難請人，同佢講大家合作完成份約為止，佢又死死氣氣同你繼續做！）估唔到佢一招「綿裡針」我差少少中計！

0 0 0

私人傳訊

wan-wan-ma

別墅

積分: 574

2^#

發表於 07-11-18 03:13 |顯示全部帖子

原文章由 wan-wan-ma 於 07-11-17 02:33 發表
上個月尾工人個妹打電話黎話urgent搵家姐，我無問原因出糧時主動advance左一千蚊過佢。上星期晨早有電話搵工人，原來佢老豆過左身！我又主動同佢講妳有七日大假（佢剛做滿一年！）決定幾時返去要話我知。

點知過左一日佢笑住口 ...

唉！琴晚阿女喊，未得閒講埋下集：
我諗如果一個人真係愛老豆，相信佢點樣都要返去參加葬禮。但好離奇咁，到我俾去揀，佢居然話只要借二千五可以唔走？唔通佢愛我個屋企多過自己果個？當然唔係！原來只係步署！

等到「財到光棍手」，佢又出第二招。話所有仔女都返齊，差佢無返，阿媽見唔到佢唔肯食唔肯訓，其他兄弟姊妹見咁，夾錢買左來回機票過佢，叫佢即刻返！佢聲淚俱下同我講返去兩日都肯！佢黎打工一時一樣，我開始起火，話佢知因為一早預備佢走，我已經取消左好多活動補唔返轉頭，跟住無理佢！

第二朝佢又黎同我講要返去五日（當我應承左！）我好大反應咁話：五日！！佢即時話四日都得！我真係火都黎埋！鬧佢話：妳一時又話唔返，一時又話要返，跟住話兩日，之後又五改四，到底妳玩夠未？！跟住佢發老脾鬧我不近人情，機票買左都唔俾佢返！我好興回答佢：若然要返妳就俾番二千五百過我，我再從頭安排過！
佢背住我擰埋塊面控訴我：意思係話我蝦佢無錢，兼累佢要退機票！

你地話佢幾無賴！佢打左十年工，話無錢（其實佢有錢到係家鄉買左兩塊地起埋樓，我地普通人望塵莫及！）打算走唔會先問淮我再買機票。到依家要退機票有損失（當然可能係假只係用黎壓我），就入晒我數！就咁我無理佢兩日，而佢亦按章工作左兩日。

呢兩日佢唔望我，又黑口黑面。我就當體諒妳死左老豆心情唔好，但我有留意情況好似走下坡，於是我琴晚忍唔住捉住佢要講清楚為止。點知頃完（鬧完交、佢喊飽），我先發現佢將一切責任推係我身上，佢怨我唔放佢走！怨我攪到佢見唔到摯愛老豆最後一面！怨我唔信佢會返黎！怨我唔體諒佢無錢！怨我唔係好 o既教徒……

我真係覺得好失望！做阿Mum係咪要任人魚肉到自己頭家都唔駛顧先至算係對得住工人！？我開始諗唔通我要怨自己生三個，怨老公唔係身邊，怨自己阿媽死得早，怨奶奶一早移左民，怨自己做家務唔叻……怨怨怨！我決定發奮圖強，以餘下合約期為限（十個月內學好d家務）由依家開始執番頭家，以後唔請工人！！！！！！
:tongue: