我想講下我既故事，我係一個34歲既女人，啱啱喺上年離左婚。喺我19歲既時候，我遇上左我前夫，我係佢第一個女朋友，我地好開心好快樂咁拍左拖一年幾，之後有一日佢突然間話要同我分開下，話我地太多爭拗，可能當時年紀小啦，我對於佢話分開只係有少少唔開心，之後好快就同左一個大我8年既男人一齊，但係過左一個多月，我前夫就搵返我，話想同返我一齊，而佢亦都知道我同左另一個人一齊，拖拖拉拉左大約一個月左右，最終我都係揀返我前夫，之後我地又開開心心咁過左3年幾，喺我地拍拖5週年紀念嗰日，佢同我求婚，而我亦都答應左佢(當時我地2個都係24歲)，但係喺佢同我求婚後2個月，佢突然間話唔結婚，話要同我分開，話唔想辜負我，話我同佢結婚我唔會有幸福。之後我地坐底好好咁傾過，最終喺我地25歲既時候，我地就結左婚。
但係好不幸，喺我地結婚後2個星期，我有一次無意中睇到佢電話既訊息(當年仲未有智能手機)，我真係無意見到的，因為咁多年嚟佢都好錫我，對我好好，我好信任佢。我竟然見到佢同第二個女人既談情短訊，而嗰個女人本身係有男朋友，佢係我前夫當時既同事，而佢亦都有嚟我地既婚禮。我當時真係崩潰了，不停咁喊不停咁喊，我前夫都知道了我睇到佢地既短訊，但我唔記得點樣我就原諒左佢了。
日子一日一日咁過，我地拍拖6年，結婚7年，一齊生活左已經13年了，我同佢喺屋企人同朋友眼中都係好幸福既一對，只可惜我地結婚咁多年都無BB，其實我係好恨有BB的，亦都去睇過醫生證實係我既問題，醫生話我係好難有BB嗰D人，但係而家諗深一層，我地無BB可能都係上天注定的。其實喺結左婚既呢7年裡面，我一次又一次的發現佢有第三者，但我都一次又一次咁原諒佢，雖然個心真係好痛好難受，但係我真係好愛佢，所以我每一次都選擇原諒佢。
最後一次比我發現佢有第三者，係喺我32歲既時候，有一晚半夜起身去廁所，我見到佢個電話已經差完電，想幫佢(炆)左條差電線，點知...我一(炆)條線，我就見到有個whatspp message寫住" With Out You Sleep With Me "呢幾隻英文字我呢一世都無辦法忘記到，當時我前夫係知道我見到呢個message的，但我地都繼續扮無野，繼續瞓覺。第二日，我有問佢究竟想點，係唔係想離婚，但佢一直逃避，一直無答過我。跟住嗰一個月我地都無乜交流，因為我個心已經痛到唔識再痛。之後有一日我喺街，收到佢send比我既message，佢話"我地不如分開啦.......下刪幾十字"，我睇到個message後，雖然係好唔開心，不停喊不停喊，喊左好耐，喊到好攰好攰，到左夜晚，我用左我平生最大既勇氣覆返佢一個message，我話"好...我地分開啦"，我終於都有勇氣去結束我地呢段13年既感情。但係...唔知點解，我對佢一D恨既感覺都無，我地而家仲可以做返朋友，間唔中都會出嚟食下飯講下大家既近況。
發表於 
返回列表
