喺家計會嘅轉介下，尋日（Day 10）我去咗旺角雅蘭８樓照輸卵管。
去之前喺呢版爬過文，有Ｄ姊妹話唔痛，有Ｄ話好似谷Ｍ咁痛。
我諗應該唔會太痛，就自己一個人去，但其實都驚驚哋。
輪到我嘅時候，姑娘叫咗我入房，遞咗樣嘢俾我，
係一舊藍色如環保袋質地的東西，用透明膠袋包住。
我問姑娘呢舊係咩黎。
姑娘答我話係衫，叫我除剩胸圍，著咗佢，開口喺前邊，裡邊有腰帶。
換完衫之後姑娘帶我入Ｘ光房，指示我瞓上床，幫我蓋埋被，
簡單解釋醫生陣間入整Ｄ藥水入子宮，跟住Ｘ照光造影，叫我等醫生來。
我心急，問姑娘話之前我 book 果時有姑娘叫我帶Ｍ巾來，
咁我下次Ｍ係由今日計起定係跟返我自己個期？
姑娘話今日就算有嘢流都唔係Ｍ，所以要跟返我個期。
我一路驚一路等咗大概１０分鐘，姑娘同一位女醫生來咗。
醫生再簡單話會塞Ｄ藥水入子宮，再照Ｘ光。
跟住就開始消毒，整藥水入子宮。
跟住兩分鐘後我開始覺得痛楚，以前未試過咁嘅痛，於是忍唔住嗌「好痛」。
我期望醫生或姑娘會係咁易安慰下我，同埋話我知大概痛幾耐。
但冇。
咁我唯有自己問「唔該醫生，請問會痛幾耐架？」
醫生面冇表情，硬倔倔答「咁你宜家仲覺唔覺好痛？」
我感覺下，咦～又真係冇咁痛了喔。
成個過程唔駛１０分鐘，堅痛時間大約有２分鐘。
如果呢種痛係谷Ｍ痛的話，咁我真係好鄧平時Ｍ痛的姊妹辛苦。
（因我好彩平時冇咩Ｍ痛，都唔知係咁痛法。）
做完之後醫生出咗去，姑娘俾咗幾張紙巾跟我抹下果度，
我一抹，咦～冇血喎～同時好白痴咁衝口而出同講埋出來。
姑娘依然冇表情「冇血咪冇血嘍～唔係個個有架！」
（題外話，化驗室個姑娘同醫生真係好令人失望，
我自認好有禮貌，小心翼翼、「唔該」前「唔該」後，但佢哋完全冇表情。
哎～我明佢哋可能平時做埋Ｄ repetitive 的工作好厭倦，
但用呢種心情返工真係唔好嘍，對自己唔好，對病人都唔好。。。）
收拾細軟、交完款、攞埋報告後，我就走咗。
走果時都唔覺得特別唔舒服。
返到屋企都係冇唔舒服，夜晚瞓覺都好正常。
今朝起身都仲ＯＫ，係度體溫時發現高過平時排卵前少少。
返到公司後，開始覺得個肚有Ｄ痛，個頭有Ｄ重，發寒，周身體痛，
完全係感冒發燒的症狀，成日返工不在狀態。
企起身時個肚有Ｄ扯住扯住，甚至有少少企唔穩添！
爬文見有姊妹形容呢種痛似胃痛。
宜家仲喺公司撐緊，但收工後的節目取消了，我知自己實去唔到。
我需要返屋企休息。
唔知有冇姊妹有我咁嘅症狀？
發表於 
返回列表
