個案如下:
事緣於2016-09-16,當時我與太太於Home 21沙田門市睇中一張梳化,而當時的sales (潘小姐)態度亦不錯,最終就決定買一張梳化及另外4張餐枱椅(同時還幫一名朋友多買一張),而當時下了一半訂金(約3000-HKD,包括梳化2500及餐椅500)!!
~~~惡夢的開始~~~
● 先講餐椅:
原已約好於2016-09-30下午送到我家,但响之前的星期四(2016-09-22),我就收到送貨公司職員來電話會响星期五(2016-09-23)送餐椅到我家,當時我奇怪明明約咗30號,點會突然早咗一個星期呢??於是我就同送貨職員講話我約咗30號,23號無人在家收貨。叫佢30號先送,但當時個送貨員工就係度依依哦哦,係咁叫我提早安排收貨,而且態度語氣都不太好。而當時我咁啱响星期三(2016-09-28)我放假,就叫佢响嗰日送嚟。而當時嗰位送貨「大哥」雖然心不甘情不願及比說話我聽,但我同佢講我一係28號,一係30號。佢唯有話28號送。(當中當然有好多說話比我聽,但我都費時理佢)。而最終响28號亦如期收到貨,但當時送貨嚟嘅「大哥」啲態度已經係敷洐,求其到不得了。但我見佢送到貨,啲貨物又無問題,都無放响心度,心想可能係個別事件啫!(但心裡亦有點嬲,點解啲態度可以咁差,仲好似鍾意幾時送貨就幾時送貨,唔需要理會客人)
● 再講梳化:
梳化本應於門市相約好於2016-10-08(星期六)下午2-6點送貨,而直到送貨前2-3日左右(確實日子因為無記錄唔記得),我太太又收到送貨「大哥」的來電,話响8號下午不能送貨,因為有太多單,要押後送貨時間。當時我就問佢要晏到幾點?送貨「大哥」就話要晚上6-10先送到。當時我太太已立即同佢講話最遲只可以等到晚上9點(因為我家有2名小孩分別4歲及2歲,晚上通常9點半就上床睡覺,而第2天我們一早就要外出帶小孩比賽)。而經過跪求之後(我真的不知何時開始原來做顧客比錢買嘢係仲要求人送貨準時),嗰位送貨「大哥」就承諾响晚上9時前送貨到我家。(Home 21仲刻意响2016-10-05發送一個送貨通知短訊到我手機表明“已確認貨品送達日期: 2016-10-08 1800-2100,如有任何更改或取消,請於送貨日前四天致電送貨部2156 3598作有關安排,否則我們可能將收取港幣200的行政費用”),如是者去到2016-10-08(星期六),當日我們倆公婆一早帶小孩完成當日的活動,下午就返家迎接我家的新梳化來臨。(註:而舊梳化亦响同日早上由我親自棄掉)
而無耐的等了又等之下,終於响大約晚上7點45分左右等到了。不過不是等到新梳化的來臨,而係等到送貨「大哥」的無情及不負責任的電話。送貨「大哥」打比我太太,話實在太多單,9點前係無辦法送到貨,要去到晚上11點半先可以到(仲話有可能要响12點後,要視乎情況)。當時我太太極力抑制住怒火,話無可能等到11點幾12點!因為如果到時候才送梳化到又要搬又要安裝,必定會吵醒小孩(況且明天一早還要去比賽)!!呢個情況係無必要嘅!!當時我太太都係好聲好氣同送貨「大哥」講!點知送貨呢位人兄並不是與我太太商量之後如何安排,而係賴皮地同我太太講話你等就等,唔等就把就!總知9點前就一定送唔到!!當時我太太已經忍唔住,立即問佢姓咩,呢啲係咩待客態度?點知呢個送貨「大哥」話佢叫「唔知」!我太太當堂無名火起,話佢而家唔可以準時送貨不特止,態度仲咁惡劣,即刻同佢嘈起上嚟!(呢位大哥仲用粗口齋鬧我太太,恕我不能盡錄)!我太太同佢爭持咗一陣,將電話交咗比我講!我首先再問佢貴姓,呢位大哥同我講話佢姓乜同呢件事無關,總之今晚就送唔到梳化,至於我之後仲要定唔要張梳化,就唔關佢事,叫我自己联絡home21!跟住我同佢講,既然你送唔到貨,啲態度仲咁惡劣,我係唔會再繼續呢個交易,而呢個「大哥」只係講咗句:X,関我X事咩!跟手cut我缐!(註:其實當時該名送貨員工如態度良好及有誠意地跟我們協商相約日子時間再送貨的話,在合理情況之下我們也樂意接受的)
到咗呢個時候,我立即打電話返去home 21沙田門市,搵返當日姓潘嘅女sales,並向簡述剛剛發生嘅事件。同時向佢表示佢哋公司不能準時送貨,已經違反合約條款,我對佢哋公司已經失去信心,要求取消交易及退回訂金!!而當時呢個sales聽完我講之後,語氣當中都表現得好無耐,仲話會立即幫我跟進!過咗約30分鐘,潘小姐打電話比我,但都只係同我講話叫我不如等到晚上11點零12點收貨!我話我唔會等,亦唔想再接觸任何佢哋公司嘅送貨員工,只係要取消交易及退訂!但佢同我講話取消及退訂一事要經客戶服務部去處理,佢幫唔到手,只能比客戶服務部電話(2156 3598),建議我向客戶服務部查詢。(雖然呢位員工態度尚可接受,但佢都只係交個波比客服)
當時已經去到大約晚上9點,我隨即再打電話去客服。接聽嘅係一位廣東話不太純正的女客服員工(在此聲明絕無歧視成份,只是實話實說),我又將之前事件經過再講一次,同時向佢表明兩樣嘢:1) 由於店方不能準時送貨兼且員工態度惡劣,違反交易時承諾,要求取消交易及退款!2) 投訴該名送貨員工態度惡劣及用粗口鬧人!而當時該該女客服就話會作記錄,交予客服部跟進!至於取消交易及退款方面係由門市經理負責,叫我自行聯絡門市!
如是者,我又再打去沙田門市找經理。今次就由一名陳姓經理接聽(全名唔記得),而我簡單再將事件及我的要求同佢講多一次(已第三次)!佢竟然又同我講話呢啲唔關佢事,有乜就同佢公司客服講(而且語氣仲係極度不負責任)!當時我已十分憤怒,同佢講話客服叫我搵門市,門市又叫我揾客服,點解你哋公司行政咁混亂㗎!!而呢位沙田門市陳經理竟然同我講:「我哋公司係咁㗎喇!一係你就等到12點,一係就取消當你撻訂,錢就無得退!」
到咗呢刻,我已決定不會再接受任何安排,向佢表明要取消交易及取回我自己的訂金,我就同呢位陳經理講:「既然你哋公司係咁不負責任的話,我亦無話可說,唯有向消委會投訴你哋公司!張梳化你唔洗送嚟比我!」而呢位陳經理回答竟然係:「而家係你話唔洗送㗎,即係撻訂!投唔投訴隨便你,總之訂就唔會比返你,反正我哋都唔係第一次比人投訴去消委會」(估唔到佢會比個咁嘅答案👍🏻👍🏻)響呢個時間,我根本唔想再同呢間公司任何職員有任何接觸,無奈的我唯有收線😔當晚之後就再無人聯絡過我哋,梳化亦當然係無送嚟!!
幾日後(2016-10-13)大約晚上7點,Home 21又有一個自稱AnsonLEE嘅職員(Tel:2691 4798)打比我,佢自稱係行政部經理。佢打嚟之後就同我講話嗰日送貨嘅工人唔係佢哋公司,唔關佢公司事。佢哋係叫GO GO VAN送貨的(真估唔到一間話自己係大型傢俱連鎖店,竟然無自己運輸部送貨,送貨原來係叫GO GO VAN的,各位可以自行選擇相信與否!!)。而當時,我已唔想再同呢間公司任何職員再多費口水理論,只同佢講你哋公司違反承諾不能準時送貨不特止,由上至下的職員態度連最基本禮貌都無,完全係不負責任及趕客!!我唔想亦無信心繼續同佢公司完成交易,只要求退回訂金!!但呢位Anson LEE竟然只係一味話安排返時間再送梳化,但係佢哋公司唔會退返訂金(佢好似認為我必定要接受佢呢個處理方法一樣)。否則只能當我自己撻訂(原來張梳化唔可以準時送到我屋企比我,就叫做我自己撻訂)。我話既然你全公司都係不負責任嘅,我再講都嘥氣!!我唯由向消委會求助。而呢位AnsonLEE竟然話:『隨便你,訂收咗就一定無得退,我地仲有你地址!』(竟然語帶恐嚇成份,唔通我會買你怕)。而之後,直到今日(2016-12-01)就再無Home 21職員再聯絡我。而事件現已交由消委會處理,我都唔想再同呢間公司任何職員有任何接觸,因為呢間嘢啲人根本唔係做生意的!!!
事後我才知道這店原來劣評如潮,不止一位市民有像我這樣的經歷,更離譜的也有!!!足可証明這店經營手法極度有問題,而且據其他苦主說法,此店係慣常以像我遭遇的手法去騙取客人訂金,又或以次貨交予客人,再以諸多籍口強迫客人收貨以賺取暴利!!是次出POST係希望籍我此經歷去警惕所有企圖幫襯呢間店舖的市民,真的要再三先考慮一下!如果唔介意像我這樣『嘥錢、激氣及火滾、及嘥時間』的話,即管去試一下。如想再加深了解事件,可直接聯絡本人或參閱此專頁https://www.facebook.com/rubbishhome21/?fref=ts!!