大家見到差館地下瞓喺度休息嘅警察,佢嘅依班着普通制服嘅已經唔算係最攰嘅人,因為佢哋主要係防守差館內部,雖然都好辛苦,但差館入邊有嘢食,有廁所去。
我哋響街着綠色防暴衫掃蕩嗰啲同事仲辛苦,孭住三四十磅野,最長連續三十個鐘頭同班人對峙,攰到通街瞓馬路坑渠邊,攞啲爛水馬,紙皮箱墊住當枕頭我都親眼見過,條街好似「屍橫遍野」一樣。
一日三餐,送到來行動地點,就只可以輪流叫一小部份人暫時離開防線,坐響後面「十零二十米」內馬路上快食,因為有嘢發生要即刻走返返上嚟,琴日就係咁,有啲人啱啱輪到佢攞到個飯食咗一啖,前邊就有嘢發生,結果佢就返上去燒催淚煙向前推進,佢嗰餐飯,等左成六七個鐘先輪到佢,就咁就冇咗.......
試過幾次根本送唔到啲飯嚟,因為啲路比暴徒塞住晒,送返啲同事都俾人打,最終連續十個鐘不停消耗體力但冇嘢食..!
依家大家學精左,有得食都盡快食,但都唔敢食得多,因為食得多冇地方去廁所仲大鑊,另外女同事,去廁所有幾唔方便大家應該明白,除咗忍辱負重,忍屎忍尿都已經變成習慣,加上長期唔夠瞓,近排好多人病,但都唔敢攞病假,你自己病缺席,少咗人,即係令到你啲同事危險左,不時見到同事自己攞包藥出嚟食,警察總部更加爆發手足口病,因為大家打緊仗,冇人會考慮儀態,通地瞓,通地食。衛生自然變差。
依家就好似打仗咁,你任何情況都唔可以行開,現時對面 D 人隨時掟個汽油彈過嚟,磚頭好似落雨咁樣飛過嚟,我琴日都俾人用丫叉,俾類似石頭嘅嘢射中,好痛,但好彩冇爆缸流血,幾間差館俾人放火,通街都有人打大交,我哋好想去處理,但根本冇辦法離開已經被衝擊緊嘅防線
香港亂咗咁耐,除咗警察仲有咩政府部門有大力幫過手?最心痛嘅仲係有唔少公務員,一齊幫街外人攻擊政府,出賣我哋,冇錯警察都有啲地方做得差,忍唔住過咗火,但係我哋都只係凡人,有血有肉有感情會受傷,我唔係機械人,都有啊媽生的....點解全世界要圍攻我哋?!
我唔介意大家廣傳出去,特別係比仍然有良心,支持我哋嘅「沉默大多數」。