吹水玩樂

時事理財

由家出發

媽媽天地

育兒教養

情報分享

意見反饋

聯絡管理員

我的中心

Baby Kingdom - 親子王國香港討論區 › 首頁 › 少年成長› 緊張學業

少年成長今日: 5|主題: 15857

收藏本版

回覆發帖

返回列表

跳至頁

查看: 37291 | 回覆: 4

緊張學業 [複製鏈接]

csir3290

子爵府

積分: 10970

1^#

發表於 23-11-19 11:06 |只看該作者 |倒序瀏覽 |打印

近排正在同老婆商量緊聖誕假嘅時候會唔會全家人一齊去下旅行，因為大家都好忙，所以都係諗住跟旅行團去幾日，本來都諗住係聖誕公眾假期之後去大約去四五日，點知到問阿仔阿女想去邊嘅時候，阿仔竟然話唔想咁遲先去，因為一放完聖誕假就考試驚冇時間溫書，佢話就算去都希望係早啲去同唔好去咁耐。到近呢個星期差唔多落實要報名嘅時候，阿仔仍然都係覺得唔好去咁耐同埋早啲去。而家我同老婆都決定聖誕假都應該會留低喺香港唔去旅行住，唔想阿仔一路玩嘅時候都一路心掛掛。

其實阿仔自升咗中學之後，我哋都覺得佢畀以前更加勤力，可能啲功課同埋要溫習嘅嘢都深咗。再加上啱啱嘅中期測驗成績都係一般，相比佢以前小學可能真係有啲距離，其實我同老婆都冇乜所謂，因為我哋真係知道阿仔係有勤力溫習，可能真係仲未適應中學嘅考試方法，尤其是係中文，連老師都話阿仔上堂好勤力，答卷嘅時候亦都寫咗好多嘢，但係就係答唔中要點，老師都話主要係因為同小學嘅測考模式唔同，所以需要時間適應。我哋而家見到阿仔每日就算冇乜嘢功課做，佢自己都會一路溫書，佢自己話因為想分開嚟溫，唔想到考試之前先至一次過溫習驚溫唔切。

作為家長其實都畀幾矛盾，見到自己個仔咁勤力，咁緊張自己嘅學業當然開心，但係另一方面有驚佢過份緊張連休息嘅時間都少咗。好似嚟緊星期日，想一家人先出街睇場戲再食埋飯，但係佢都話要睇下到時做唔做得曬啲功課先。我哋都知道因為呢一次測驗嘅成績其實對佢有少少挫敗感，所以佢想喺考試嘅時候做返好啲。

其實我同老婆已經喺佢面前盡量都唔提成績，盡量多啲鼓勵佢，畀佢知道其實我哋已經好欣賞佢咁勤力，成績唔係我哋最在意嘅地方，因為我哋知道佢已經盡力。多啲陪佢傾啲無謂嘢，搵啲時間同佢一齊睇下電視傾下偈打下機，盡量令佢放鬆下。還好阿仔都仲算係一個好樂觀嘅人，而且佢嘅中學生活亦都算融入得幾好，每日返到嚟都仲會同我哋講好多學校嘅嘢，所以我同老婆雖然知佢好緊張學業，但係暫時嘅情況都仲可以放心。

做家長就真係辛苦，細路仔學業唔好又擔心，到好似阿仔咁緊張又係擔心，我同婆婆都知道，而家同阿仔阿女相處唔可以再成日依依哦哦，要多D了解佢哋嘅生活圈子，要多啲同佢哋一齊傾偈，要了解同認識佢哋鍾意嘅嘢，先至可以同佢哋保持良好嘅溝通。雖然我哋都緊張阿仔阿女嘅行業，但係總唔能夠將學業成日掛喺口邊，亦唔能夠成日只係睇住成績嚟決定佢哋有冇盡力。總之喺呢個時間同佢哋保持良好嘅溝通先至係最重要。

0 0 0

私人傳訊回覆引用

找對的人

大宅

積分: 4211

2^#

發表於 23-11-21 23:21 |只看該作者

聖誕假後一返去就考試
阿仔又講得無錯喎
早起早返因為要溫書嘛
佢咁有計劃咁自動自覺係好事
留返新年復活節再去啦

私人傳訊回覆引用

fishballbaby

侯爵府

積分: 22020

2024年龍年勳章 2024勳章 2023年兔年勳章好媽媽勳章畀面勳章環保接龍勳章 wyeth冷知識勳章

3^#

發表於 23-11-23 11:50 |只看該作者

有些學校聖誕假後就考試，仲有聖誕假期功課要做，真係未必想像中咁清閑。

私人傳訊回覆引用

oncidium-y

大宅

積分: 4728

4^#

發表於 24-1-5 00:28 |只看該作者

本帖最後由 oncidium-y 於 24-1-5 00:33 編輯

我同你處境一樣。聖誕假後立即考試。仔只願晚上外出食餐飯。
我同老公週末成日要唸計仔引仔外出輕鬆下。
我哋真係覺得生活重點唔應該只係讀書，
真係只要佢想做功課溫書就由得佢晚晚11pm後才休息。日夜忙碌…年中小休過青年期？做父母也很矛盾.. 只好從旁觀察他情緒和給予支持♥️