身為楊思琦與吳帥( Andy) 10多年同學兼好友的前港隊跳水隊成員俞越,昨日挺身為二人講說話,他承認 10多年前介紹思琦與吳帥認識,當時他們互有好感,但未有拍拖。俞越說:「以前我哋三個人行得好埋, Andy有話畀我知佢好鍾意思琦,不過唔知佢有冇表白,後來佢知道思琦有豪仔,所以冇行動。」有指思琦一腳踏兩船,俞越說:「冇呢樣嘢,佢哋拍拖都係呢一、兩個月嘅事。」二人如何開始?俞越說:「唔清楚。」
吳帥現時心情怎樣?俞越說:「佢家承受好多壓力,佢同我講,佢愛思琦愛咗咁多年,佢因為愛呢個女人,所以佢接受任何對佢嘅指摘、唔公平嘅對待,或者唔係事實嘅報道,因為佢鍾意思琦,所以會更加愛佢、 take care佢,更加要佢幸福。其實佢唔需要思琦喺呢個圈做嘢,完全可以養到思琦,佢 finance好、 title好,做嘅生意好。」有指吳帥經常問人借錢,俞越說:「以前吳帥住堅尼地城御花園,層樓 4、 5千萬,佢 7、 8歲跳水已經用大哥大電話,佢老竇以前係上市公司主席,佢老竇家返咗內地,喺機構做高官,生意做得好大,係礦產生意。」然而本報獲小額錢債審裁處資料指吳帥 06年欠債唔還,俞越說:「呢樣真係唔清楚,呢啲係佢以前個人嘢,但佢家 background我好清楚。」