未結婚之前，我同佢講過我係一個好需要人陪的女人，當時拖拍無論幾夜佢都係等我收工陪我出街食飯，當時佢話我一個女人仔住一個人食飯好孤獨好淒涼，所以佢一定要陪我，之後我有咗bb，我當時同佢講大家都未ready想落咗個bb，佢喊住同我講想同我結婚生個b出嚟，我當時真係好愛佢，亦考慮得好清楚生個b出來就要對亞b負一世責任，最終我哋都結婚生咗亞囡。由我決定生亞囡開始，我真係全心全意愛囡囡愛呢個家。
我唔介意邊個付出多d少d，但我介意只係得我單方面付出。識佢第一日已經知道同佢一齊係要捱，一定係公一份婆一份先可以生活。係拍拖的時候，因為知佢人工唔高，如果日日出街食飯佢負擔唔到，之後佢屋企人叫我唔好日日出街，話煮埋我飯，咁我就開始晚晚去食飯，當時有畀返伙食費同有幫手開枱執碗，間唔中買d水果上去。
到開始攪結婚，佢媽媽就開始現形，我人生兩件大事(結婚 / 亞囡滿月)都畀佢亞媽攪到好唔開心，佢亦知道我唔開心，話虧欠咗我，會更加錫我補償返畀我，可惜最後佢選擇佢亞媽拋棄我仲要同我爭亞囡。
大肚時公司歧視我，我真係好唔開心，我日日喊住返工，佢叫我為呢頭家點都要忍，我忍到好辛苦，但為咗頭家我幾辛苦都撐住，產前檢查佢只係陪過我一次，當時我有唔開心過，因為次次去到見到其他媽媽有老公陪，但我就孤伶伶加上公司的事，但佢話請唔到假我體諒佢，到我開刀生完bb出院，由下午等佢接我出院等到夜晚七點多，佢話要ot唔同得我出院，我係醫院喊咗出嚟。
到坐完月復工第二日公司就解顧我，我拎住幾萬諗住一家三口捱住申請攞公屋，原本佢份工工資剛好夠申請公屋，我已經提佢減少ot，等攞咗編號再算，但佢無理我，最後因為超額數百蚊無得申請，而我無怪過佢，唯有出返嚟做嘢，可惜我英文唔好加上行頭窄，搵咗好耐朋友先介紹到現在份工畀我，係未搵到工其間，佢同佢屋企人係咁畀壓力我，我又要湊住亞囡，真係好辛苦，因為一路以來係上奶奶度食飯，奶奶都有說話聽，佢又次次遲畀家用，提咗佢好多次都唔記得，我好堅持男家的事由老公攪，而我女家的事從來無煩過佢。到亞囡去咗育嬰園(因為準備工作要預先送囡囡入院適應)，我就開始煮飯做家務，我體諒佢要返工，所以屋企嘢無要求佢做過，屋企家頭細務我做晒，係屋企佢無幫過亞囡換過一條片沖過一次涼，夜晚亞囡扭計都係我湊，佢係瞓到完全唔知亞囡喊過。就算佢係屋企，我煮飯的時候，只要亞囡扭計，都係我放低廚房嘢去睇完亞囡再煮。
到我開始返工，佢要求再返奶奶度食飯，因為剛開始我未適應又返工又湊囡的生活，我答應再返奶奶度食飯，惡夢就開始了，奶奶係一個小氣的人，同佢反映相處唔到，佢無處理，仲迫我同佢亞媽困獸鬥，最終爆煲，自此我無再上男家，而我爸爸對佢亦開始有不滿，因為一直就算我同佢有乜爭吵都好，我唔會返外家數佢，但佢唔同，無論大事小事，大吵小吵，佢第一時間就走返佢屋企數我，佢屋企只會我唔體諒佢，奶奶當我面鬧我話做女人就係要蝕低，為頭家要忍讓要體諒個老公，最後有次嘈到叫晒兩家人上門三口六面講清，當時我娘家只係叫咗爸爸同一個細佬上嚟，而佢全家就老爺奶奶二叔二嫂三叔同佢上嚟，奶奶口臭到話驚我哋對老爺不利，佢就同我亞爸講，話我煮啲嘢唔係人食，話我迫佢食食到佢嘔，佢就日日自己返老爺度食，上次嘈到要離婚，佢就去我爸爸屋企同我爸爸傾，我爸爸講佢咁樣掉低我一個長此落去唔得，佢就唔出聲，就係呢一刻我爸開始好不滿佢(因為我一直無係爸爸面前講佢壞話仲幫佢講咗好多好說話，所以亞爸無話過佢一句，亦無教訓過佢，只係解釋畀佢自我有幾唔開心)，但佢無改善，之後因為育嬰園收得早，有時趕唔切，所以轉咗畀本地姨姨湊，但個姨姨又反口又黑面，佢怪我搵錯姨姨湊囡，我話我返工而且搵咗幾個都唔合心水，咁我都無辦法，叫佢自己搵，佢又話搵唔到，最後變咗朝早我送亞囡去姨姨度，夜晚佢湊亞囡走，但佢係湊埋亞囡返佢屋企食飯，食到十點十一點先返。因為佢話要佢屋企人幫手湊要額外畀多d錢。所以家用我要畀大份(財政一直係佢管，我一個月要拎成8000畀佢，6000係家用，另亞囡同屋企日用品，玩具衫褲全部我另外再畀，佢月尾會問我借一千幾百唔還)。我曾經要求過佢直接湊亞囡返屋企唔好返老爺度，但佢唔答應，又話我霸住個囡唔畀佢亞爸亞媽見，咁我都算。
終於捱到亞囡兩歲可以返n(可以延展到八點)，我可以自己湊返學放學，我開始唔畀錢過佢手，佢負責屋租，我負責亞囡同企所有開支，佢就開始鬥氣，一星期7日都話要開工，日日無十一、二點唔返，日日如是，我人工只係多佢一千，但我就日日要返工放工湊囡，從來無自己時間可以出去見朋友(就算佢湊亞囡返佢亞媽度，只要我通知佢要去街，佢十點就會打畀我催我返屋企)。我要求過佢星期日唔好返陪我同亞囡出街，佢一定會話唔得，亞囡學校親子日營叫佢請假又話唔得，但係佢朋友叫佢請假幫手，佢就一定請到假(佢上年d年假未放晒)。仲有佢公司ot係有錢的，糧單亦打咗佢ot時間，不過無佢講咁多，我問佢點解，佢話佢果d係秘撈，d錢仲要係年尾一次過收。之後佢就收埋晒d糧單唔畀我睇。
都咗前幾晚我忍唔住同佢嘈仲出手刮咗佢好多巴，佢就發狼係咁出盡力打咗我好多拳，打到我頭暈企唔到起身，佢仲想再打我，好在當時嘈醒亞囡，亞囡嚇到喊，但佢都未想收手，叫我再同佢打，我知我唔夠佢打，我攬實亞囡唔敢再出聲，就係呢一刻我完全死心，下定決心離開呢個男人。我話要同佢離婚，我話我要返個囡，佢仲指責我話我唔畀亞囡佢亞媽湊係我一早舖好路，我真係好鬼嬲，我係囡囡亞媽，我湊返自己個囡有錯嗎，我無唔畀佢返嚟一齊湊個囡，佢係選擇咗同佢亞媽過下半世，我真係忍唔住話佢，你咁鍾意你亞媽，點解要咁害我，你咪同你亞媽結婚生仔上床攬住佢過人世，做乜要招惹我攪到我咁唔慘怪埋個囡。
http://www.baby-kingdom.com/forum.php?mod=viewthread&tid=3776538&page=1
發表於 
為妳的女兒而加油!!!
返回列表
