時政擂台

收藏本版
發帖
返回列表
跳至頁

首頁
1

尾頁
   0
DucklingYau


大宅

積分: 1787


1#
發表於 12-9-22 00:22 |只看該作者
真假政經 - 王慧麟
雙非教育城

(2012年08月14日)

【am730專欄】我城的另一個偉大傑作，就是去搞新界東北。推土機蠢蠢欲動。依家八十後青年關心的首位，係地產霸權式的掠地及圈地行為。
我呢類中坑，腹垂過膝，瞓唔到推土機下面大叫反制霸權。值得大家關心的，是用地的分配。政府最偉大的傑作，是忽然增加了教育用地！
用把間尺度下，單係坪輂同埋粉嶺北，有成30至40公頃，如果係千禧校舍的設計，即係可以起23間！按每間可容納1,000個學生，即係二萬三千幾個學生。
呢啲學生究竟邊度出來？你可以話，佢哋係照顧新發展區衍生出來的人口。但係，響依家政府仍然在北區殺村校的情況下，忽然又要重新建校，有點不可思議。
因此，新增的學校要應付的，不只是自然增長的人口，而是假設有一批雙非兒童衍生出來的教育需要。早在今年5月，已經有報道話，北區欠缺約400個小學學額，以應付雙非兒童的需要。新開發區的土地，同樣，是為了應付雙非學童的需要。
當然，有人會說，佢哋都係港人，有教育權。但搞教育，係咪即係響北區求其畫幾塊地，搞一個雙非教育城就可以呢？如果只係想搞幾塊地，將中學小學塞入去，然後叫雙非學童口岸兩邊走，是哪門子的教育理念？其所製造的社會問題，包括交通、設施及福利需要，又點樣處理？
點解香港的教育規劃搞成咁？
私人傳訊

DucklingYau


大宅

積分: 1787


2#
發表於 12-9-22 00:22 |只看該作者
真假政經 - 王慧麟
「雙非教育城」的迷思

(2012年08月22日)


【am730專欄】沒有調查研究，沒有發言權。呢個政府最鍾意講口號、拋數據。好，今日本欄「僭建」新開張，先拋下三個同雙非有關嘅數據。
第一，統計處於7月31日公布，07至11年之間，有14萬2千幾名雙非及2萬3千名單非嬰兒出生。根據統計處的意見調查，有九成的單非父母，以及四成一的雙非父母話，會在小朋友六歲之前來港生活。於是，統計處就計出，未來4年適齡的幼稚園人數會增加2萬人，未來6年小學適齡人數會增加8萬5千多人。
呢個數字對教育設施有何壓力？舉例，一個千禧校舍，大概可以容納一千個學生。理論上，需要起多80間小學，先至可以應付需求。
依家我地小學生人數有32萬左右，多咗嗰8萬幾學生，就學需求回復番去06/07年的水平。但係，唔好忘記，由06/07年到依家，我地總共殺咗近100間小學！
第二，今年新界北區，小一派位的數字，令好多家長嚇咗一跳。今年1月28號有報道話，在2011年小一派位首三個志願的成功率，北區同元朗都低咗，同名校區一樣咁差，只有64%。立法會6月6日有一個北區學額嘅質詢。政府話，2012年度，有6.6％，即係145個北區本地小學生要跨區返學，情況比起舊年增加近一倍。
唔好睇小呢145人，有報道話佢地要去大埔撲學位。有小學校長話，雙非或單非細路來北區返學，要留番啲學額畀佢地，結果就迫本地家長撲去另一區搵學校。有北區地區組織話，佢地欠缺約400個當區學位。
第三，我地又睇下另一堆數字。依家跨境學童人數，發展趨勢好快。2010/11年，有4,575名小學生、1,538名中學生同埋3,786幼稚園學生跨境返學，總共有9,899名。有報章計過，2011/12年有12,865名，到了今個學年估計有17,000人。
跨區，一般都去北區，但有小學校長話，少數家長會送細路去大埔，甚至沙田。跨區返學，口岸頂唔頂得順？今年6月，林瑞麟在人口政策報告中提到，希望將跨區學生人數，每年限制喺13,000個。
比較上面數據，你會好擔心。適齡的單雙非幼稚園學生增加2萬人，但係就每年限制了跨境學童只有1萬3千個(包括幼稚園、中小學)。咁樣，突出來的學額需求點解決？一係要單非家庭分隔兩地，一係要雙非家庭來香港定居，一係就要北區增加雙非保母服務！
題外話：有咁嘅需求，香港樓價又點會跌呢？
私人傳訊

DucklingYau


大宅

積分: 1787


3#
發表於 12-9-22 00:23 |只看該作者
真假政經 - 王慧麟
「雙非教育城」的現實

(2012年08月23日)


【am730專欄】新界北區的教育，被跨境學童(有當區小學校長指有唔少學童係雙非，無具體數據我唔敢講)拉到資源分薄。本地家長要跨區返學，去年小一派位之中，首三志願的成功率，同九龍城名校區差唔多，都係64%。
意思即係，北區同九龍城的競爭程度係一樣！
好啦，依家統計處預計，將有八萬幾個額外的雙非小學學額需求。點算呢？
政府依家響新界東北新發展區，預留咗一堆土地，作教育用途。總共有15.7公頃。我地假設係以千禧校舍，0.7 作標準，即係接近23間學校。好了，假如我地只係用來做小學，就會有約23,000學額。加加埋埋，都唔夠八萬個的新增雙非加單非小學學額之需求。
我地仲未有呢幾幅地的詳細規劃，依家只係見到，有幾幅教育用地都唔細。要物盡其用的話，政府可以將學校重新設計，密度大些，戶外空間少些，甚至可以共用設施，將佢搞成一個「學校村」。但係，受制於依家只會容許13,000個跨境學童過關的限制(相信係各口岸的使用量已至極限)，所以就要等埋蓮塘口岸開放，至有機會放寬多些跨境學童。
唔好忘記，頭先只係假設，呢堆新教育用地係用來「招呼」雙非，成為「雙非教育城」，至可以頂住新增的就學需求，而且仲未有考慮到，本地人口之自然增長。但係，坦白講，唔響新區搞「雙非教育城」，對全港教育學額的壓力會更大，因為到時候，雙非學童唔響北區返學的話，好可能就會「打散」去其他地方。依家香港有36個校網，部分校網(如96係南丫島、蒲台島)係無可能增加學額來迎接雙非，又有部分校網，地理上可發展新學校之空間太少，而且學生又不能太密集，恐防返學放學之時，令交通承受巨大壓力。
因此，北區、元朗之校網固然「高危」，鐵路沿線之學校因為交通便利，相信係取錄雙非學生的重要地方。加上，如果一下子湧入咁多新學生，舊嘅學校唯有靠一班加多幾人，或者就同依家北區小學一樣，向隔籬區借學位頂檔，應付需求，教學質素又會點呢？
「雙非教育城」係一個迫出來的解決方案，唔規劃的話，雙非學童就要散晒去各校網，本地家長必然大反彈。規劃的話，就會變成雙非學童集中地，為該區埋下另一個教育地雷。
私人傳訊

DucklingYau


大宅

積分: 1787


4#
發表於 12-9-22 00:23 |只看該作者
真假政經 - 王慧麟
「雙非教育城」的荒謬

(2012年08月29日)


【am730專欄】繼續以答問形式，模擬政府回應新界東北新發展區嘅「雙非教育城」之口徑，再提出有建設性的反駁。
政府模擬回應口徑(二)：新界東北發展區的教育用地，點樣規劃、幾時設計等方案，仲未出台，我地仲諮詢緊市民嘅意見。
外界理性反駁：統計處講嘅，2016年需要八萬幾嘅雙非小學學額。除非統計處搞錯，否則社會需要為此思考點樣做。依家唔去詳細思考呢些用地的設計，更待何時？
仲有，我哋計出來，呢些用地最多只有23,000個學額，係以千禧校舍做標準，但係，雙非學童需求有幾大，同幾多，佢哋幾時來香港，冇人可以預知，有可能唔夠用。所以，依家仲唔想清楚點樣規劃，仲要左思右想搞數據，搞得來可能有唔少雙非學童要來香港返學。唔通政府到時又要全香港的校網用以前那些舊三招：加浮動班、加每班人數同埋取消全日制來應付？
只係用數字來思考及解決教育難題，素來係香港教育政策嘅痼疾。依家唔講清楚規劃，更待何時？
政府模擬回應口徑(三)：教育局正在為日後雙非學童來港的教育問題做緊工作，到適當時候就會公布。我哋唔應該將新界東北新發展區規劃同雙非學童教育混為一談。
外界理性反駁：如果唔係有雙非教育城曝光，社會就唔會有雙非學童來港搵書讀嘅討論。問題係，我哋要處理嘅，唔單只係冷冰冰嘅數字，而係有血有肉嘅教育難題。
一間學校，有本地人又有雙非學童，老師上課時究竟應該點樣做？雙非學生聽講粵語及英語，繁體字等，只係一般嘅難題。實際上當然唔止。以處理新移民學童教育為例，依家政府有所謂的「啟動課程」，或者民間提供的「適應課程」，以及學校本身嘅「校本課程」，加埋學校社工的幫忙，至可以加快協助新移民學童盡快融入香港教育制度。
但係，呢類課程嘅假設，係呢班新移民學童嘅家庭，係以香港為永久居住地。但係，日後嘅雙非學童，有錢嘅，可能全家響香港住。錢唔多嘅，可能就住響深圳河嘅另一面，日日跨境上堂。咁樣，我哋係咪要用另一套教學模式處理呢？點樣將佢地融入主流教育制度呢？要唔要重新搞過一套教學方式？要唔要增加教育資源來幫校長同老師？
政府欠社會一個交代！

私人傳訊

DucklingYau


大宅

積分: 1787


5#
發表於 12-9-22 00:23 |只看該作者
真假政經 - 王慧麟
「雙非教育城」的答問

(2012年08月30日)


【am730專欄】上星期特首梁振英忽然巡視落馬洲的出入境情況，同場加映，入境處示範跨境學生過關的新安排。入境處表示，新安排可令學童入境人數增加三成。
當然，梁振英又自詡如何妥善處理「雙非」問題云云。
這些自吹自擂的吹水「秀」，多看無妨，反而有助勾起大家擔心新界東北區，日後可能真係出現「雙非教育城」。有人會鬧我，點解咁擔心呢件事，係咪杞人憂天？依家仲係諮詢緊之嘛，到時有事咪再改囉。
搞公共政策同寫評論有一個共通點，就係以最壞的情況作最好的打算。唔想像一下最壞嘅情況，政策之制定就會失焦，就唔會諗到最有利社會嘅政策。為咗令大家進一步理解雙非教育城所帶來嘅社會問題，依家用「答客問」的方式，想像一下政府嘅回應口徑，然後就用最理性的態度回應。
模擬政府回應口徑(一)：現在新發展區教育用地之規劃，係按區內自然增長的人口而制定，主要係針對區內新增之自然人口，而唔係應付雙非兒童。
理性之反駁：正如有民間團體講，新界東北新發展的私人住宅比例偏高，而且只係低密度，屬於豪宅級別，針對的不只是本地人，而是北方之富豪。假如教育用地係針對呢班人士的話，這些學校豈不是成為北方富豪子女之學習樂園？
實際上，新增的土地逾17公頃，要解決嘅豈只是新增人口所帶來的學額需求呢？新界北區學額短缺嚴重，有團體估計，今年短缺400個小一學位。佢哋呼籲，北區重開村校以解燃眉之急。
政府當然唔肯。
我於是試過走一轉，去一間已廢置嘅村校，響上水華山村嘅華山學校。呢處響邊度？大家可以由上水火車站出發，向天平邨方向行過去，然後轉去奕翠園隔籬條馬路行入去，經過梧桐河嘅橋，往左手邊再走入去。行路嘅話，大概要成20至30分鐘。若果係細路仔行去嘅話，沿途無瓦遮頭，加上水貨客及自由行之「喼神」橫衝直撞，情況都幾危險。最好都係有校巴接載。
問題係，華山村口個位都幾窄，大概只能讓小巴行過。咁樣，即使係重開村校，淨係擴闊路面，加埋重建校舍，搵辦學團體開工，最快都要3年，收地擴闊馬路嘅話，隨時要多幾年，仲煩。
政府唔重開村校，有佢嘅理由。因此，「雙非教育城」嘅規劃，更加唔係響紙上劃出來，而係有理由咁樣做。
私人傳訊

jeanne1120


子爵府

積分: 11135


6#
發表於 12-9-22 00:31 |只看該作者
根本話呢個新界東北地區唔係 serve 大陸人，係呃鬼啦

成個梁振英政府的人，都係講大話唔眨眼...之前明明梁振英同大陸南方都市報講左呢個地區係for 深港融合的，宜家突然就話完全無咁既事，林鄭仲話好驚訝... 如果呢個計劃唔關大陸事，點解之前諮詢要諮詢大陸官員？

明明全香港有三千幾四千公頃的空置住宅規劃用地 (官地)，可以話起公屋就即起，點解係要俾幾唔知幾多億賠償去收返新界東北？根本就係睇中塊地近大陸！

其實唔止係做雙非教育城，塊地起的樓又係俾邊個住？政府講得好好聽，話要起多d 屋俾香港人住，解決香港人住屋需要。但塊地咁根邊界，最後邊個住丫？除非呢度的私樓係「港人港地」，如果唔係肯定益哂大陸人黎住！樓價仲要俾佢地炒貴哂！好合理者，大陸人黎住，又有個教育城，咁d 細路以後就唔使跨境返學啦！
私人傳訊

DucklingYau


大宅

積分: 1787


7#
發表於 12-9-22 00:49 |只看該作者
2012年8月29日

王岸然
梁振英割地壞「兩制」

筆者從來對梁振英作客觀評論，並贊成給他應有的蜜月期，以待他能順利開展施政。蜜月期應有多久？一般說是三個月，現在尚未過期，但有些事情不能等下去，特別是若然他企圖有割讓特區利益以圓他「港深一體化」、「同城化」、「雙子城」和「深港都會」偉大構想之時，筆者無法不作警告——破壞一國兩制，不管梁振英的出發點如何，亦難逃歷史罪人的惡名。

上述幾個概念好聽是「港深融合」，難聽是要把二千公頃的邊境土地，面積大約等於由尖沙咀到深水埗這樣大小未開發的地區，割讓予中國的富一代佔用。牛哥（曾健成）不要再去保衞釣魚台了，那裏只是七平方里的地方，香港有數十倍於釣魚台的地方將要割讓予深圳，牛哥應利用他的抗爭經驗，帶領港人打一場本土保衞戰！

早有意發展邊境

這幾個概念，自然不是梁振英所創，但他寫過好幾千字的文章支持和深化這些概念，則是鐵一般的事實。筆者支持評論的自由，但從來極為看不起只知民粹、不做調查研究的評論員，特別是今天網上資料唾手可得，評論者還是只知作出情緒性的人身攻擊，何來說服力？

「新界東北發展區計劃」不是梁振英政府提出的，而是早前兩朝的1999年就有討論文件，這是事實；所以要發展新界北三處地方——古洞北、粉嶺北新發展區、坪輋／打鼓嶺新發展區不是梁振英的主意，是鐵一般的事實。

不過，更鐵一般的事實是，本來發展這三處地方的構思（這三處是主要之地，新界東北有可能發展的，還包括馬鞍山、丙崗、大埔滘、大埔北、林村谷、龍躍頭和汀角；新界西北則有洪水橋、天水圍南、錦田、凹頭、新田、牛潭尾、元朗南和藍地石礦場），立法會規劃地政及工程事務委員會十多年前就已經有討論文件研究。

這些地區的發展，只是為了解決人口增多的住屋問題，把「新界東北發展區連結港深邊境成為香港特區內的特區，令港深在這片有半個九龍之大的地區之內融合成為一體」，則是梁振英經濟哲學的重點所在，他的用語是「邊境發展區」，在這個區內，深圳的富人可以自由出入，不用簽證；自然還可以購買區內的豪宅居住，成為港深兩地通行的有限數量經濟貴族。

如果一如政府的「包裝」，說這個發展區是為了增加港人所急的房屋供應，在這三區內用上十分一、約兩百公頃的土地興建大型屋邨就可以解決問題，其他地方可以照舊維持原來的自然面貌。由於不少發展商早就自行收地囤地，政府與他們商討購地便可以，不用像現時要剷除多條有幾十年歷史的農村，要上演令數千名農民要「被停耕」、「被上樓」、「被城市化」的社會悲劇了。

優質地供給深圳富豪

當然，深圳來的富豪不會願意住在公屋般大小的樓房之內的，於是香港最自然美好的邊境地區就要大興土木，建設多元化的古洞北發展中心；有河畔良辰美景的粉嶺北低密度住宅，還有優質坪輋打鼓嶺產業區。據有關諮詢文件中的地圖和資料所示，公屋只佔房屋量的四成，在規劃中遠離河畔靜景，高密度地只佔地區不到10%的土地，高密度的私人樓宇（說不高於三十六層）情況相近。

換言之，在這個偉大的邊境發展特區中居住的十八萬人，只佔用居住用土地的二成，其餘八成居住地建成優質房屋，供深圳而來的富豪所享用，估計只是幾千人。

一如梁振英慣用的語言技巧，政府文件沒有細分的資料而只有大數目，大數目是公私屋宇的比例定在四與六，但沒有說這六成如何分配，而所有資料都沒有保證私人樓宇只限港人居住。邊境發展區的構想本來就是方便深圳人到港，美其名是發展經濟，但就放棄了本土。

不過，有數十年歷史、養活不少基層人民的農業，逼農民住上公屋，到新經濟區內從事低技術、低薪酬的工作，這是改善他們的生活、還是迫害他們？出身基層的梁特首知否他在破壞、在迫害數千人的生活？這是暴君才會做的事情，是天理不容的。

再諮詢只屬拖延

梁振英與林鄭月娥都說不是安排免簽證給深圳富豪，而說什麼落地簽證，這又再一次玩弄語言詭辯，因為兩者沒有分別；當然，他們還不承認這是一次割地予深圳的喪權辱港行為。2008年3月20日，梁振英在《明報》發表一篇名為〈以邊境發展區促進經濟持續發展〉的文章，文中鼓吹「以促進人、資金和物資的往來，構思港深共同發展的新模式」。

梁振英非常具體地在文章中提議，把邊境全部或大部分地區劃為港深發展區，目的是方便大陸居民到港購物，經商、投資、求學、求醫和接受其他港式服務。非常清楚的是，梁振英建議放寬北線出入境限制，大陸居民可以「免簽證進入發展區」；今天他說不是免簽證，是再一次公開講大話！

因為村民的激烈反對，規劃署說會再諮詢一個月，但就算再諮詢一年，政府也不會把賣港的陰謀公開的。要保衞家園，港人要起來了！
私人傳訊

KacaMama


禁止訪問

積分: 1797


8#
發表於 12-9-22 06:19 |只看該作者

回覆：新界東北「雙非教育城」

提示: 作者被禁止或刪除 內容自動屏蔽
私人傳訊

tokyobaby


禁止訪問

積分: 4836


9#
發表於 12-9-22 10:49 |只看該作者
提示: 作者被禁止或刪除 內容自動屏蔽
私人傳訊

nammo


大宅

積分: 4998


10#
發表於 12-9-22 18:29 |只看該作者
回覆 jeanne1120 的帖子

agree !!
私人傳訊

PANDABBB


禁止訪問

積分: 1096


11#
發表於 12-9-22 19:17 |只看該作者

回覆：新界東北「雙非教育城」

提示: 作者被禁止或刪除 內容自動屏蔽
私人傳訊

galax


大宅

積分: 4168


12#
發表於 12-9-22 19:24 |只看該作者
多謝樓主分享，不過好長，未睇完。
私人傳訊

caramelpudding


伯爵府

積分: 16822


13#
發表於 12-9-22 22:25 |只看該作者
推, 清晰
私人傳訊

貪靚麥芽糖


大宅

積分: 3841


14#
發表於 12-9-22 22:54 |只看該作者

回覆：新界東北「雙非教育城」
私人傳訊

Freshment


大宅

積分: 3073


15#
發表於 12-9-23 00:50 |只看該作者
話就話咨詢會，但眼見咁多人反對都仲一直話唔會擱置，咁係咩咨詢？
私人傳訊

hkgalcarrie


男爵府

積分: 7205

熱血勳章 睛靈勳章


16#
發表於 12-9-23 08:13 |只看該作者

回覆：新界東北「雙非教育城」

雙非滾蛋，搞到香港七國咁亂
http://7W2D - 7cm, 16W5D - 性別係 .......仔
私人傳訊

jimckk


複式洋房

積分: 357


17#
發表於 12-9-23 09:01 |只看該作者

回覆：新界東北「雙非教育城」

去死啦，食屎狗梁振英
私人傳訊

tsewong


侯爵府

積分: 24234


18#
發表於 12-9-23 10:56 |只看該作者
成個東北計劃係點, 我冇研究, 唔敢妄下判斷

至於話係雙非教育城, 如果起嗰啲學校, 收生嘅前提係只收有出世紙嘅(即係大陸戶籍唔包), 我又覺得ok

呢幾年成17萬個雙非出世, 個個都知, 佢地已經好多需要來香港讀幼稚園同小學, 今年北區小學爆哂, 有啲本地學童要誇區, 已經突顯個問題. 啲學校唔會突然間爆多咗出來, 再唔解決, 只會一年比一年嚴重

就學校呢個point, 我贊成, 始終呢個問題要解決, 香港法律係出世紙發咗係收唔返, 咁點安置班學生? 俾佢地集中喺一度上堂, 又近深圳, 咁北區收少啲雙非, 都ok

其他房屋嘅配套係點我唔清楚, 不過如果公屋同居屋比例多過5成, 而又唔係免簽證就可以入嘅, 都ok. 事實上班大陸人而家都迫爆北區啦, 除非你取消自由行
私人傳訊


首頁
1

尾頁

跳至頁
返回列表
回覆
發帖

© 2024 Baby-Kingdom.com Limited.

網站： 聯絡管理員 廣告查詢 私隱政策 使用條款 免責聲明 使用意見