今朝搭地鐵返工果陣,啱啱行咗入車箱就感覺到後面有人推架車仔撞到我隻腳,一般呢個時候都好少老人家搭車,所以當時心唸“有冇攪錯!”但當我擰轉面一望,原來係一架BB車,但係上面坐住咗一個大約8、9歲既男仔,好明顯佢係一個心智上有缺陷既小朋友,個一刻我個心即刻一酸,腦裏面即時出現Miki同Caspar同我一路食飯一路傾計既picture,跟住又出現我好惡咁“丙”佢哋既畫面。
其實我真係要好感恩上帝比咗兩個健康活潑既小朋友比我,有時我會學業成績睇得好大,大到連我自己都抖唔到氣……..
最近Daddy介紹我睇一本書,其實呢本書係啱啱暑假去台灣旅行時買既,但我一路都冇時間睇,雖然只係睇咗兩個chapter,但都解開咗我少少心結,作者有3個仔女,依家巳經長大成人而且在社會上有一定成就,佢唔係要show off自己啲仔女好叻,而係叫我哋為人父母既最重要係比小朋友有一個全面既發展,學業只係佔一個好少既份量……….
講真,我自己出嚟做野我都知做人處事同良好人際關係比讀書成績重要N倍,但係讀書成績好相對地將來出嚟做事條路會好行啲,especially响HK呢個社會,小朋友從考KG開始巳經要應付一連串既competition,雖然我哋知道呢個係K型現象,但奈何我哋卻係生存响呢個咁既地方,我唸世界上都冇邊個地方既育制度怪得過HK,所以有時啲人話生响HK既細路好幸福,我只可以agree 50%,你睇佢哋個schedule,根本一個星期都唔知有幾多時間係佢哋自己既!