一齊玩飛行棋~~

今日六姨婆送咗一盒小熊維尼飛行棋比大少, 大少食完晚飯後就好興致勃勃咁要求一家人一齊玩!  難得我今日早收工, 所以就陪佢玩完先檢查功課啦!  點知一打開個盒, 竟然發現無棋子, 大家好疑惑之際, 我就見到盒面寫住"小熊維尼與朋友之棋子需另購!   咁點算好呢?  聰明既我靈機一觸, 諗到用打麻雀的籌碼暫代棋子, 好彩有齊所需既四種顏色, 於是一家四口就開始玩第一次既飛行機啦!