關寶慧爆 Chi Lam住猛鬼屋
鬼神說法,「信則有、不信則無」。藝人成日周圍飛,又要捱更抵夜,唔夠精神加上時運低,撞到邋遢嘢一啲都唔出奇。
萬聖節就嚟喇!今期我哋搵嚟關寶慧、江若琳、官恩娜等大爆親身嘅撞鬼經歷。關寶慧更指曾在 Chi Lam、靚靚屋企撞鬼,而 Chi Lam就直認:「我以前間屋好猛!」
關寶慧一直與 Chi Lam靚靚熟絡,想不到會在他們家中撞鬼。
關寶慧說:「好多年前,有一晚我同麥家琪去袁詠儀、 Chi Lam屋企打麻雀,大約打到兩、三點,大家都覺得係時候要瞓,於是夾手夾腳執枱。差不多執完,我見到家琪行去廚房客廁嘅方向,以為佢會入廁所,點知佢冇入,仲一直行去晾衫位。當時我以為佢睇風景,跟住我諗住去廁所,但當我扭廁門時,道門竟然鎖住咗,我心諗唔係咁邪嘛!於是敲門問:『家琪,你喺廁所?』廁所入面嘅家琪答『係呀!』聽完之後我即時毛管戙晒,原來之前行去晾衫位嘅唔係家琪。靚靚見到我面都青埋,問我發生咩事?佢見我冇反應,就知道我『見到嘢。』第二日家琪去問師傅,師傅同佢講話隻女鬼喺街度惹返嚟,係想搵替身害死家琪。好彩早發覺,師傅幫家琪做咗場法事請佢走。」
本周一( 12日),記者就此事問 Chi Lam,他直言:「我以前間屋好猛。有一次我返到屋企,突然發現花樽嘅玫瑰花跌落地,但花瓣就好齊咁圍住花梗,當時得我同靚靚住,都知咩事。」